Արտակ Նազարյանի մահվան գործով դատավարությունը շարունակվում է ավելի քան մեկ տարի եւ երեք ամիս:
Դատավարության դեկտեմբերի 11-ի նիստը նախ կես ժամով հետաձգվեց, որովհետեւ ամբաստանյալներից եւ պետական մեղադրողներից դատական նիստին ոչ ոք չէր ներկայացել:
Կես ժամ հետո վերսկսված նիստին ներկա էին նաեւ տուժողի իրավահաջորդ Ծովինար Նազարյանը, վերջինիս ներկայացուցիչները՝ իրավապաշտպան Ռուբեն Մարտիրոսյանը եւ փաստաբան Մուշեղ Շուշանյանը:
Կարդացեք նաև
Բացակայում էին ամբաստանյալ 3 զինվորների պաշտպաններ Ազատ Շահբազյանը, Ալվարդ Մնացականյանը, գլխավոր ամբաստանյալ Հակոբ Մանուկյանի պաշտպաններ Հրանտ Գեւորգյանը եւ Արմինե Ղասաբօղլյանը, ամբաստանյալ Վահագն Հայրապետյանի պաշտպան Լեւոն Պողոսյանը: Ամբաստանյալները հայտարարեցին, որ դատը կարող է կայանալ առանց իրենց պաշտպանների մասնակցության:
Դատավոր Սամվել Մարդանյանը հարցրեց պաշտպանների բացակայության պատճառների մասին: Ծովինար Նազարյանն ասաց, որ պաշտպաններ Հրանտ Գեւորգյանին եւ Լեւոն Պողոսյանին տեղափոխող մեքենան Աբովյան-Սեւան ճանապարհին, Բյուրեղավանի մոտ վթարի է ենթարկվել, պաշտպանները վնասվածքներ չեն ստացել, սակայն մեքենան ջարդվել է: Ծ. Նազարյանն ասաց, որ այդ մասին իրեն տեղեկացրել են պաշտպաններ Գեւորգյանը եւ Պողոսյանը:
Իրավապաշտպան Ռուբեն Մարտիրոսյանն առաջարկեց նիստը սկսել, որպեսզի ինքը ներկայացնի մի միջնորդություն: Դատավոր Ս. Մարդանյանն ասաց, որ ներկայումս միջնորդությունների ներկայացման եւ քննարկման փուլ է, եւ առանց պաշտպանների ներկայության դատ չի կարող կայանալ:
Դատական հաջորդ նիստը նշանակվեց դեկտեմբերի 18-ին:
Ոսկան ՍԱՐԳՍՅԱՆ
