ՅՈՒՆԵՍԿՕ-ի Ոչ նյութական մշակութային ժառանգության պաշտպանության մասին կոնվենցիայի միջկառավարական կոմիտեի հաջորդ նստաշրջանը կանցկացվի Ադրբեջանում` 2013-ի դեկտեմբերին: Այս մասին տեղեկանում ենք ՅՈՒՆԵՍԿՕ-ի կայքէջից: Եվ սա այն այն դեպքում, երբ Ադրբեջանն իրականացրել է Ջուղայի խաչքարերի սպանդը, ինչը պատշաճ դատապարտման չի արժանացել ո՛չ միջազգային հարության ու կառույցների կողմից, ոչ էլ Ադրբեջանն է հրապարակավ ընդունել իր մեղքը:
Aravot.am-ը Հայաստանում ՅՈՒՆԵՍԿՕ-ի ազգային կոմիտեի քարտուղար Քրիստինա Մեհրաբեկյանից հետաքրքրվեց՝ ինչո՞ւ հայկական պատվիրակությունը, որի կազմում իրենից բացի, նաեւ ՀՀ մշակույթի փոխնախարար Արեւ Սամուելյանն էր, որեւէ կերպ չի արձագանքել այդ որոշմանը: Տիկին Մեհրաբեկյանը հեռախոսով պատասխանեց, որ իրավասություն չունի հարցազրույց տալու, ապա հավելեց. «Հայաստանյան պատվիրակությունը չի կարող նման բանն առարկել կամ չընդունել, որովհետեւ դա պրոցեդուրային հարց է, որը ՅՈՒՆԵՍԿՕ-ի կենտրոնակայանն է որոշում»:
Հիշեցնենք, որ այս տարվա դեկտեմբերի 5-ին ՅՈՒՆԵՍԿՕ-ի Ոչ նյութական մշակութային ժառանգության պաշտպանության մասին կոնվենցիայի միջկառավարական կոմիտեի 7-րդ նստաշրջանում «Սասնա ծռեր» էպոսի կատարողական դրսևորումները» հայտը քննարկվել եւ ապա ընդգրկվել էր ՅՈՒՆԵՍԿՕ-ի՝ Մարդկության ոչ նյութական մշակութային ժառանգության ներկայացուցչական ցանկում: Ընդ որում՝ տարբեր երկրների կողմից ներկայացված 70 հայտերից 36-ն էին ստացել դրական փորձագիտական եզրակացություն եւ ընդգրկվել նստաշրջանի օրակարգում: Նույն ցանկում է ընդգրկվել նաեւ թառը՝ իբրեւ ադրբեջանական նվագարան, ինչը panorama.am-ի մատուցմամբ, հարուցել է իրանցի երաժշտագետների դժգոհությունը: Նրանք դա որակել են գողություն ադրբեջանցիների կողմից եւ դժգոհել, թե ո՞ւր էին քննարկման ժամանակ իրանցի պատվիրակները:
Կարդացեք նաև
Ի դեպ, անցյալ տարի հունիսին ՀՀ մշակույթի նախարարությունը եւ Ֆրանսիայի Հանրապետությունում ՀՀ դեսպանությունը ՅՈՒՆԵՍԿՕ-ի հետ համագործակցությամբ հունիսի 15-24-ը կազմակերպել էր «Խաչքարերի արվեստը. Հայկական խաչքարեր» խորագրով ցուցահանդես: ՅՈՒՆԵՍԿՕ-ի տնօրինությունը հեռացրել էր բացատրական գրությունները լուսանկարների տակից՝ թողնելով միայն խաչքարերի ստեղծման տարեթվերը: Հայկական պատվիրակությունը համառել էր, ի պատասխան դրա՝ սրահից դուրս էր տարվել ՅՈՒՆԵՍԿՕ-ի դրոշը, արդյունքում՝ բացման արարողությանը ղեկավարությունը չէր ներկայացել:
Ավելի վաղ՝ 2010-ին, հայկական խաչքարերը՝ ոչ նյութական մշակութային ժառանգություն ճանաչելու կապակցությամբ Ադրբեջանը բողոք էր արտահայտել՝ պնդելով, թե խաչքարերը «միայն հայկական չեն»։
Գոհար ՀԱԿՈԲՅԱՆ
