Այսօր Շիրակի մարզի 3 լավագույն գյուղերի ` Ախուրյանի, Մեղրաշենի ու Արևշատի գյուղապետերը միասին կմեկնեն Գերմանիա` Մյունխենի շրջակա գյուղերի տնտեսական զարգացման փորձը ուսումնասիրելու: Հետաքրքիրն այն է, որ Ախուրյանի երկարամյա , ՀՅԴ-ական գյուղապետ Արծրուն Իգիթյանից զատ, Շիրակի մարզի 116 գյուղերից արտասահման գնալու բախտ վիճակվել է միանգամից երկու ՕԵԿ-ական գյուղապետերի: Նրանցից մեկը Մեղրաշենի գյուղապետ Հունան Պետրոսյանն է` Արթիկի ոստիկանապետի եղբայրը, ով նաև Արթիկի տարածաշրջանի ՕԵԿ կառույցի պատասխանատուն է, իսկ մյուսը` Արևշատի գյուղապետ Սայաթ Խաչատրյանն է, ով , ըստ մեր տեղեկությունների, Հունան Պետրոսյանի երեխաների քավորն է: Ինչպես մեզ տեղեկացրեցին Շիրակի մարզպետարանի տարածքային վարչությունից, մեկ ամիս առաջ Տարածքային կառավարման նախարարության և համայնքների միության կողմից Արևշատ գյուղը ճանաչվել է հանրապետության լավագույն գյուղական համայնք: Իսկ այս գործում Արևշատի գյուղապետին օգնել է ճիշտ հարկահավաքությունը, համայնքային խնդիրների ճիշտ լուծումը, գյուղում շատ ծրագրեր իրագործելը և այլն: Մարզպետարանցիների ասելով, 4-5 տարի է` գյուղական լավագույն համայնք ճանաչվում են Շիրակի մարզի գյուղերը: Թեև այս անգամ ՏԻՄ-ի կազմավորման 16- ամյակին նվիրված մրցույթում Շիրակի մարզպետարանը 3 համայքների անուններ է ներկայացրել ` Ախուրիկի, Արևշատի և Անուշավանի, սակայն ընտրել են 2082 բնակչություն ունեցող Արևշատը: Ու որպես պարգև` քիչ թե շատ աչքի ընկնող գյուղապետերին հնարավորություն են ընձեռել մեկ շաբաթ շրջագայել Գերմանիայի գյուղերում , նրանց փորձն ուսումնասիրել, ինչու չէ մի քիչ էլ Եվրոպան վայելել:
Նունե ԱՐԵՎՇԱՏՅԱՆ
