«Ժամանակին դիպլոմը մեծ նշանակություն ուներ, որովհետեւ բոլորը գիտեին՝ ինչպես են դրան հասնում: Մեծ նշանակություն ուներ գիտությունների թեկնածու կամ դոկտոր լինելու հանգամանքը, որովհետեւ բոլորը գիտեին, թե դա ինչ տքնաջան աշխատանք է: Բայց հիմա բոլորը գիտեն, թե ինչպես կարելի է դա շատ արագ ստանալ եւ ինչ ձեւերով ստանալ: Դրա համար այդ ամեն ինչը արժեզրկված է»,- ՀՅԴ խմբակցության ղեկավար Արմեն Ռուստամյանն Aravot.am-ի հետ զրույցում այսպես պատասխանեց մեր հարցին, թե ինչու է պատգամավորների մի զգալի մաս 30, 40 նույնիսկ 50 տարեկանում է զգացել« ուսման ծարավ» ընդունվել բուհ ու դիպլոմ ստացել: Ըստ Արմեն Ռուստամյանի, «Դա տեղավորվում է այն տրամաբանության մեջ, որ այսօր գոյություն ունի: Արժեզրկման մի քանի գործընթաց կա: Ամեն ինչ արժեզրկվել է, այդ թվում՝ կրթությունը, դիպլոմ ստանալը, պաշտպանելը: Թղթով այսօր ոչ մեկի չես զարմացնի, որովհետեւ այդ թուղթը մի ուրիշ թղթով առնում են: Թուղթը թղթի հետ փոխանակում են՝ վերջանում է: Իրականում մարդիկ չեն ստանում այն գիտելիքը, որը պիտի գնահատվի այդ թղթով»:
Թե ինչի՞ համար են վերցնում դիպլոմներն այդ տարիքում, գեներալ Մանվելին, Մուրադ Մուրադյանի, Աբրահամ Մանուկյանի, Տիգրան Ստեփանյանի կամ մյուսների ինչի՞ն է պետք դիպլոմը՝ Արմեն Ռուստամյանն այսպես բացատրեց. «Ո՜նց, որ ասեն՝ էդ էլ ունենք: Դաչա ունեն, ավտո ունեն, էն ունեն, էն ունեն, բա մի հատ դիպլոմ չունենա՞ն»:
30 տարեկանում դիպլոմ ստացող պատգամավորներից է նաեւ ՕԵԿ խմբակցության ղեկավար Հեղինե Բիշարյանը: Նա այդ առնչությամբ մեզ հետ զրույցում պատասխանեց. «Դա իմ անձնական խնդիրն է, եւ որեւէ մեկի խնդիրը չէ, թե ես երբ եմ բուհ ընդունվել, երբ եմ ավարտել, այ քեզ բաաաա՜ն»:
Երբ տիկին Բիշարյանին փոխանցեցինք Արմեն Ռուստամյանի գնահատականը, որ դիպլոմն արժեզրկված է, որ պպատգամավորներն ուղդղակի տանն ունենալու համար ձեռք են բերում դիպլոմ՝ տիկին Բիշարյանը համաձայնեց. «Իհարկե, արժեզրկված է: Ես այն մարդկանցից մեկն եմ, որ կրթության, գիտության մարդ եմ, տասնյակ տարիներ աշխատել եմ դպրոցում, նաեւ որպես մանկավարժ թեկնածուական եմ պաշտպանել, գիտությունների թեկնածու եմ, ես իմ ճանապարհն ունեմ: Թե 2-3 կամ 4 տարի հետո ինչու եմ ուշ դիմել, կրթությամբ զբաղվել՝ դա իմ խնդիրն է»:
Կարդացեք նաև
Հռիփսիմե ՋԵԲԵՋՅԱՆ
