Դեկտեմբերի 10-ին ՀՀ սփյուռքի նախարար Հրանուշ Հակոբյանն ընդունեց Հայաստանում Քուվեյթի արտակարգ և լիազոր դեսպան Ն.Գ. պարոն Բասսամ Մոհամմեդ ալ Քաբանդիին, Միջազգային իսլամական բարեգործական կազմակերպության ղեկավար Մոհամմեդ Ս. Մ. Աբուգեյթին, «Քուվեյթ Նյուզ» գործակալության գլխավոր խմբագիր Համեդ ալ-Ամիրիին:
Սփյուռքի նախարարի հետ նոյեմբերի 29-ին կայացած հանդիպման ընթացքում դեսպան Բասսամ Մուհամմադ ալ Քաբանդին նախարարին տեղեկացրել էր, որ իր՝ Քուվեյթ կատարած այցի ընթացքում պայմանավորվածություն է ձեռք բերվել Հայաստանում գտնվող սիրիահայերին 100.000 ԱՄՆ դոլարի սահմաններում աջակցություն ցուցաբերելու վերաբերյալ:
Նախարար Հ. Հակոբյանը հանգամանորեն ներկայացրեց Հայաստանում գտնվող սիրիահայերի հիմնախնդիրները և աջակցության ծրագրերն իրականացնելու այն անհրաժեշտ ուղղությունները, որոնց առանձնահատուկ ուշադրություն և առաջնահերթություն պետք է հատկացնել: Նախարարը տեղեկացրեց, որ ներկայումս Հայաստանում գտնվող սիրիահայերի համար շարունակում են առաջնահերթ մնալ բնակարան, աշխատանք և կայուն եկամուտ ունենալու խնդիրը: Սիրիահայերը ՀՀ սփյուռքի նախարարության աջակցությամբ հիմնել են իրենց հասարակական կազմակերպութույնը` «Սիրիահայերի հիմնախնդիրները համակարգող կենտրոնը», որի աշխատանքների շրջանակում բացահայտվում և գնահատվում են սիրիահայերի կարիքներն ու առաջնահերթ հիմնախնդիրները, ապա դրանք ներկայացվում են տարբեր բարեգործական կազմակերպությունների, որի արդյունքում որոշակիորեն լուծվում են նրանց հագուստի, պարենային մթերքների ձեռքբերման հարցերը:
Միջազգային իսլամական բարեգործական կազմակերպության ղեկավար Մուհամեդ Ս. Մ. Աբուգեյթին տեղեկացրեց, որ իրենք ցանկություն ունեն տեղում` ՀՀ սփյուռքի նախարարության օժանդակությամբ, ուսումնասիրել իրավիճակը, որոշել սիրիահայերին տրվող օժանդակության ձևն ու չափը:
Կարդացեք նաև
Նախարար Հ. Հակոբյանը խորհուրդ տվեց Հայաստանում գտնվող սիրիահայերի համար իրականացնել երկարաժամկետ և մնայուն ծրագրեր՝ նկատի ունենալով բնակարանների անհրաժեշտությունը: Միջազգային իսլամական բարեգործական կազմակերպության ղեկավար Մուհամեդ Ս. Մ. Աբուգեյթը պատրաստակամություն հայտնեց ուսումնասիրել նախարարի կողմից արված առաջարկները՝ միաժամանակ նշելով, որ իրենք, այնուամենայնիվ, ցանկություն ունեն հատկապես երեխաներին ապահովել տաք հագուստով, դեղորայքով և պարենային մթերքներով:
Հանդիպման ավարտին որոշվեց նպատակակետ ընդունել 200 առավել կարիքավոր ընտանիքներին առաջին անհրաժեշտության պարենամթերքով, տաք հագուստով կամ ծածկոցներով ապահովումը: Սփյուռքի նախարարության օգնությամբ նրանք տեղում կուսումնասիրեն և կծանոթանան իրավիճակին, այնուհետև անհրաժեշտության դեպքում նոր մոտեցումներ կորդեգրեն:
ՀՀ սփյուռքի նախարարություն
