Վրաստանն ու Ռուսաստանը 2008 թվականից ի վեր առաջին անգամ ուղղակի բանակցություններ կնախաձեռնեն: Այս մասին հայտարարել է Ռուսաստանի արտաքին գործերի նախարար Սերգեյ Լավրովը:
«Մենք կարձագանքենք Վրաստանի վարչապետի հատուկ ներկայացուցչի հայտարարություններին եւ առաջիկայում նրա հետ հանդիպում կկայանա: Մենք հույս ունենք, որ այդ հանդիպումը որոշակի հստակություն կմտցնի մեր հարաբերություններում», – երեկ Մոսկվայում հայտարարեց Լավրովը՝ Վլադիմիր Պուտինի վստահված անձանց հետ հանդիպման ժամանակ:
Ուշագրավ է, որ Լավրովն այս հանդիպման ընթացքում ակնարկել է այն առաջին զիջման մասին, որին հնարավոր է գնա ռուսական կողմը:
«Մենք պատրաստ ենք քննարկել Վրաստանում արտադրված գյուղատնտեսական ապրանքների ներկրման վերսկսումը: Հարկ է նաեւ հիշել, որ Վրաստանի տարածք էլեկտրաէներգիա եւ գազ մատակարարող ընկերություններում ռուսական մասնակցություն եւս
առկա է: Այնպես որ, մենք պատրաստ ենք քննարկել ցանկացած առաջարկ, որը կյանքից է բխում, խելամիտ է, սակայն պետք է հասկանանք թե հատկապես ինչ կոնտեքստում են մեզ առաջարկում բարելավել հարաբերությունները», – նշեց Լավրովը:
Կարդացեք նաև
Ինչ վերաբերում է վրացական կողմին՝ մի քանի ժամ առաջ պաշտոնական Թբիլիսին հաստատեց ապագա բանակցությունների փաստը։
«Ռուսաստանի հետ հարաբերությունների գծով վարչապետ Իվինիշվիլիի հատուկ ներկայացուցիչ Զուրաբ Աբաշիձեն ռուս դիվանագետների հետ կհանդիպի արդեն այս շաբաթ՝ Եվրոպայում», – հայտարարեց Վրաստանի արտաքին գործերի նախարար Մայա Փանջիկիձեն, հավելելով․ – «Ռուսական կողմն ինքն է դիմել անձամբ Զուրաբ Աբաշիձեին հանդիպման առաջարկով: Այս բանակցությունները զուտ տեխնիկական բնույթ են կրելու եւ որեւէ կոնկրետ արդյունք ակնկալելու կարիք չկա: Բայց այն փաստը որ նման հանդիպումը կայանում է, արդեն իսկ լավ է»:
Գեւորգ Ստամբոլցյան
«Ազատություն» ռադիոկայան
