Ռուս հասարակության միջազգային խորհրդի ասոցիացիայի ղեկավար և «ՌԻԱ Նովոստի»-ի խորհրդի անդամ Գենադի Բորդյուգովը «Վեստնիկ Կավկազա» լրատվականին իր տեսակետներն է հայտնել Հարավային Կովկասի երկրների հետ Ռուսաստանի հարաբերությունների վերաբերյալ:
Հարցին, թե արդյոք հնարավո՞ր է, որ փոխվեն Ռուսաստան-Հայաստան հարաբերությունները, այն պարագայում, երբ Հայաստանը գնալով ավելի շատ է համագործակցում ԱՄՆ-ի հետ, Բորդյուգովը պատասխանել է.
«Որպես պատմաբան ես համոզված եմ, որ նման բան տեղի չի ունենա: Կան հարցեր, որոնք լուծվում են տարբեր երկրների հետ հարաբերությունների ակտիվությունից անկախ»:
Հարցին, թե հնարավո՞ր է արդյոք, որ Իրանում պատերազմ սկսվի և դրան ներգրավվի նաև Ադրբեջանը, պատմաբանը պատասխանել է.
Կարդացեք նաև
«Իհարկե, պատերազմի հավանականություն գոյություն ունի կամ, այսպես ասած, ռազմական գործողությունների: ԱՄՆ-ում ընտրություններն ավարտված են, ու գործելու ժամանակն է: Այս համատեքստում Ադրբեջանի հետ համագործակցության մեծացումը կարևոր է, քանի որ այն առանցքային երկիր է տարածաշրջանում: Այստեղ դիվանագիտական նուրբ խաղ է առկա, միաժամանակ մեկից ավելի խաղաքարտեր են սեղանին. դրանցից մեկի անունն է «Ղարաբաղ», մյուսինը՝ «Գաբալա», և այլն: Բայց կրկին, որպես պատմաբան, ինձ համար դժվար է պատկերացնել, որ Ադրբեջանը կարող է մեր երկրների միջև հարաբերությունն ու Հարավային Կովկասի կայունությունը զոհել հանուն Արևմուտքի»:
Պատրաստեց Հովհաննես ԻՇԽԱՆՅԱՆԸ
