Տավուշի մարզի բնապահպանական ոլորտում կոռուպցիոն ռիսկերի վերաբերյալ դեկտեմբերի 6-ին մարզպետարանում կայացած քննարկման ժամանակ մարզի դատախազ Աննա Մանթաշյանը նշեց, որ այդ ոլորտում կոռուպցիա ծնող բազմաթիվ պատճառներ կան: Նրա վկայությամբ՝ կոռուպցիային նպաստում է նաեւ պետական եւ տեղական ինքնակառավարման մարմինների, իրավապահ մարմինների պաշտոնատար անձանց խիստ տեղայնացված, սերտաճած լինելը տեղի ազգաբնակչության, այդ թվում՝ հանցավոր տարրերի հետ՝ սոցիալ-տնտեսական , գործնական, գործարարական ընդհանուր շահերի շրջանակներում:
Դատախազի խոսքերով՝ ակնհայտ է, որ նշված երեւույթների առաջացման հիմնական պատճառը համատարած անպատժելիության զգացմունքն է, որը պաշտոնատար անձանց մոտ ստեղծում է հանցավոր ինքնավստահության պատրանք՝ ստեղծելով կոռուպցիոն երեւույթների, պաշտոնական դիրքը չարաշահելու, իշխանազանցության, հովանավորչության եւ այլ նմանատիպ դրսեւորումներով անձնական բարեկեցության ապահովելու սովորույթ:
Դատախազը հայտնեց, որ ոստիկանության կազմակերպված հանցագործությունների դեմ պայքարի գլխավոր վարչության կողմից մարզում ապօրինի անտառահատումների դեմ պայքարի շրջանակներում իրականացված միջոցառումներով հարուցվել է 9 քրեական գործ, որով պետությանը հասցված վնասը կազմել է 8 միլիոն 204 հազար 500 դրամ:
Միաժամանակ նախապատրաստվել են 11 նյութեր, որոնցով հանցակազմը չի բավարարվել քրեական գործ հարուցելու համար, վարչական իրավախախտման այդ փաստերով պետությանը հասցված վնասը կազմել է 1 միլիոն 721 հազար 990 դրամ: Այդ միջոցառումների արդյունքում ոստիկանության 5 աշխատակից ազատվել է աշխատանքից:
Կարդացեք նաև
Ոսկան ՍԱՐԳՍՅԱՆ
