ՀԱԿ անդամ «Հայրենիք և պատիվ» կուսակցությունը, որը նախորդ նախագահական ընտրություններում սատարում էր Լևոն Տեր-Պետրոսյանին՝ այս անգամ չի սատարելու նրան: « Ոչ մի թեկնածուի գործող կամ ապագա առաջադրվելիք «Հայրենիք և պատիվը» չի աջակցելու»,-«Ա1+»-ին տված հարցազրույցում ասել էր կուսակցության նախագահ Գառնիկ Մարգարյանը՝ հայտնելով, որ չի պատրաստվում առաջադրել նաև իր սեփական թեկնածությունը:
Այսօր էլ ՀԱԿ անդամ մեկ այլ կուսակցության՝ «Մարդու իրավունքներ 96» կուսակցության նախագահ Ռուբեն Թորոսյանն է, որը հանդես է գալիս նաեւ իբրեւ Հայաստանի պառլամենտարիզի կենտրոնի ղեկավար՝ հայտարարություն է տարածել 2013թ. ՀՀ Նախագահի ընտրությանը ՀՊԱԿ մասնակցության մասին. « Առաջին անգամ, Հայաստանի համապետական ընտրություններում, մասնավորապես, ՀՀ Նախագահի 2013թ. ընտրությունում, մենք, որևէ ձևաչափով պաշտոնական մասնակցություն չենք ունենա հետևյալ պատճառաբանությամբ՝
- տեղական դիտորդների զեկույցները ո՛չ հրապարակվում /ըստ ԸՕ-ի/ և ո՛չ էլ քննարկվում են որևէ ձևով,
- պետական իրավասու մարմիններն, այդ թվում, ԿԸՀ-ը և դատախազությունը, զանգվածային ձևով չեն քննարկում ընտրադիմում-բողոքները և բացահայտ դեմագոգիկ պատասխաններ են տալիս,
- իրավասու միջազգային կառույցները և, առաջին հերթին, ԵԱՀԿ/ԺՀՄԻԳ դիտորդական առաքելությունն, իրենց «ազդեցիկ» գնահատականներում, հաշվի չեն առնում քաղաքացիական հասարակության գործունեությունը,
- ընդդիմադիր համարվող քաղաքական հիմնական ուժերն, ընտրական գործընթացներում, լրջորեն չեն պայքարում ընտրական իրավունքի պաշտպանության համար, ավելին՝ ոչինչ չեն անում ընտրախախտումների հետևանքների վերացման ուղղությամբ,
- միջազգային որոշ կառույցների, մասնավորապես Եվրամիության, բարձրաստիճան պաշտոնատար անձիք շարունակում են պաշտպանել կամ ուղղորդել հայաստանյան ընտրահանցագործներին:
Այսինքն, մեր պաշտոնական գործունեությունը դարձել է անիմաստ կամ անարդյունավետ:
Սակայն, մենք կշարունակենք ուշադիր հետևել ընտրական գործընթացներին և միջազգային ու հայաստանյան հանրությանը պարբերաբար կներկայացնենք մեր տեսակետն այդ մասին»:
Կարդացեք նաև
Հիշեցնենք, որ միայն նախորդ խորհրդարանական ընտրություններում էր Ռուբեն Թորոսյանի ղեկավարած կազմակերպությունը ԿԸՀ կողմից հավատարմագրվել՝ դիտորդական առաքելություն իրականացնելու համար: Սակայն նա մշտապես է հաղորդագրություններ տարածել ընտրական օրենսդրության խախտումների մասին:
