Ինչպես տեղեկացրել ենք, անցած շաբաթ Վեհափառ հայրապետը մասնատեց, երկու մասի բաժանեց Շիրակի թեմը `տեղաբնակների կողմից անչափ սիրված հոգևոր առաջնորդ Միքայել եպիսկոպոս Աջապահյանի ձեռքից վերցնելով Արթիկը` իր 23 գյուղերով: Կաթողիկոսը Արթիկի թեմի առաջնորդ կարգեց իր ոսկեվազցի համագյուղացուն` Մայր աթոռի միջեկեղեցական հարաբերությունների բաժնի պատասխանատու Հովակիմ եպիսկոպոս Մանուկյանին: Ինչպես պատմում են արթիկցիները, այսօր տեղի է ունեցել Արթիկի նորընծա սրբազանի գահակալության արարողությունը. Շիրակի թեմի առաջնորդ Միքայել եպիսկոպոս Աջապահյանը հովվական գավազանը փոխանցել է նոր սրբազանին, այսինքն գահն ու առաջնորդական աթոռը զիջել է նրան: Այսպիսով, Շիրակի թեմի առաջնորդ Միքայել եպիսկոպոս Աջապահյանը նոր սրբազանին ներկայացրել է արթիկցի հավատացյալներին, որոնց մեջ գերակշռող է եղել քաղաքի վերնախավը` նորընտիր քաղաքապետ Արսեն Աբրահամյանը, փոխքաղաքապետ Գևորգ Ղուլիջօղլյանը, ԱԺ պատգամավոր Մուշեղ Պետոյանը, գյուղապետեր, Արթիկի ու շրջակա գյուղերի դպրոցների տնօրեններ ու փոխտնօրեններ: Այս արարողությանը մասնակցել է նաև Շիրակի փոխմարզպետ Սեյրան Պետրոսյանը:
Հետաքիքրն այն է , որ պատարագը մատուցվել է Արթիկի նախկին ժամի ու պետական քոլեջի մոտ գտնվող Վարագա եկեղեցում, որը կառուցվել է Արթիկի նախկին քաղաքապետ Խաչատուր Վարագյանի ու նրա երկու եղբայրների` Դավիթի ու Մխիթարի ֆինանսավորմամբ, սակայն , նրանք այսօր հրավիրյալների շարքում չեն եղել: Որպես հավատացյալ` մասնակցել է միայն Վարագյանների կրտսեր եղբայրը, ով, ըստ եկեղեցականների, ամեն կիրակի մասնակցում է պատարագներին:
Նշենք, որ Վարագա եկեղեցին Վարագյան եղբայրները կառուցել են ոչ միայն որպես աղոթատեղի, այլև քաղաքի չքավոր մարդկանց սգո արարողություններ ու հարսանիքներ անցկացնելու համար անվճար դահլիճ տրամադրելու նպատակով: Եվ քանի որ այն եկեղեցական համալիր է, կողքին կառուցվում է նաև Սուրբ Հովհաննես եկեղեցին` դարձյալ Վարագյան եղբայրների նախաձեռնությամբ:
Կարդացեք նաև
Ինչևէ, ինչո՞ւ նախկին քաղաքապետ Խաչատուր Վարագյանին ու ԱԺ նախկին պատգամավոր Մխիթար Վարագյանին նոր Սրբազանի գահակալության արարողությանը չեն հրավիրել: Եկեղեցականների ասելով, Արթիկի սրբազանի ձեռնադրման արարողությունը եղել է Մայր Աթոռ Էջմիածնում, նա պաշտոնապես այստեղ է հռչակվել Արթիկի սրբազան, իսկ այս մեկը պաշտոնական արարողություն չէ, և հավատացյալներին որևէ հատուկ հրավերք չի ուղղվել, հետևաբար և նրանք, ովքեր ցանկություն են հայտնել գալ ու մասնակցել պատարագի, եկել են:
Նունե ԱՐԵՎՇԱՏՅԱՆ
