ՀՀ սփյուռքի նախարարության և Երևանի պետական համալսարանի միջև տարիների ընթացքում գիտական ու մշակութային ծրագրերի շրջանակներում ձևավորված համագործակցությունը իրավական հարթության վրա դրվեց: ՀՀ սփյուռքի նախարար Հրանուշ Հակոբյանը և ԵՊՀ ռեկտոր Արամ Սիմոնյանը պայմանագիր ստորագրեցին 2012-2017թթ. գիտակրթական և մշակութային համագործակցության վերաբերյալ:
Այսուհետ գիտական, կրթական, գեղարվեստական գրականության, հետազոտական թեմաների պատվերներն ու հրատարակումը, ինչպես նաև միջոցառումների ու ծրագրերի համատեղ մշակումը, կազմակերպումն ու իրականացումը Հայաստանում և Սփյուռքում պայմանագրային բնույթ կկրեն: Համատեղ կկազմակերպվեն գիտաժողովներ ու համաժողովներ, ուսանողների պրակտիկան: Կշարունակվի ԵՊՀ-ի հետ համատեղ Սփյուռքագիտության ամբիոնի գործունեության ապահովումն ու սփյուռքագիտության գծով մագիստրոս մասնագետների պատրաստումը, «Սփյուռք ամառային դպրոցի» գործունեությունը:
ՀՀ սփյուռքի նախարար Հրանուշ Հակոբյանը պայամանգրի կնքումը կարևոր իրադարձություն համարեց՝ մատնանշելով այն հիմնական ուղղությունները, որոնցով արդեն իսկ ծավալվել ու շարունակվելու է ընթանալ գործակցությունը: Համագործակցության առաջին քայլը ԵՊՀ-ում Սփյուռքագիտության ամբիոնի հիմնումն էր ու մասնագետների պատրաստումը: Որպես 2-րդ ուղղություն նախարարը նշում է, որ գիտական կարևոր բոլոր համաժողովները կազմակերպում են համալսարանի հետ: Համատեղ իրականացվող 3-րդ ուղղությունը հետազոտական աշխատանքներն են: Սփյուռքը բազմաշերտ է, ունի շատ խնդիրներ, որոնք նախարարությունն ուսումնասիրում է ԵՊՀ գիտնականների հետ:
Կարդացեք նաև
«Մայր բուհը մեզ համար դարձել է այն հիմնարար կենտրոնը, որի հետ նախարարությունը հիմնադրման առաջին օրվանից գործակցում է»,- նշեց Սփյուռքի նախարար Հրանուշ Հակոբյանը՝ կարևորելով հատկապես Սփյուռքի համայնքների պատմությունը գրի առնելու գործում ԵՊՀ մասնակցությունը:
«ԵՊՀ-ն լրջորեն է մոտենում այս համագործակցությանը: Մեր անցած ուղին կարճ է, բայց բազմաբովանդակ: Կարծում եմ` ձեռքբերումները թույլ են տալիս կառուցել համագործակցության միանգամայն նոր մակարդակ: Ուրախալին այն է, որ դասախոսական և ուսանողական նորանոր շրջանակներ են ներառվում այս համագործակցության մեջ»,- նշեց ԵՊՀ ռեկտոր Արամ Սիմոնյանը:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՍՓՅՈՒՌՔԻ ՆԱԽԱՐԱՐՈՒԹՅՈՒՆ
