«Դեռահասության տարիքը ճգնաժամային տարիք է, երեխաները հոգեբանական եւ սեռական առումով գտնվում են դեպրեսիոն վիճակում: Փոխվում է մարդու ներաշխարհը, անցում է կատարվում ավելի հասուն շրջանի»,-այսօր լրագրողների հետ հանդիպման ժամանակ ինչպիսի խնդիրների են բախվում դեռահասները անցումային տարիքում թեմայի շուրջ նշեց սեքսոպաթոլոգ Վրեժ Շահրամանյանը:
Նրա պնդմամբ դեռահասների մոտ ագրեսիվ, ոչ ադեկվատ վարքագիծ է նկատվում.
«Ուզում ենք լինել սեռակրթված, սակայն բանալիները դեռ չենք գտել կողպեքները բացելու համար: Շատ անգամ ծնողները դիմում են այն պահանջով, որ սաստենք դեռահասների սեռական վարքագիծը: Դա սխալ է եւ ստեղծվում է տհաճ իրավիճակ: Ծնողը պետք է հասկանա, որ դեռահասը աճում ու զարգանում է»:
Սեքսոպաթոլոգի համոզմամբ սեռակրթությունը լայն ասպարեզ է, երեխայի հետ պետք է խոսել փոքր տարիքից սկսած.
«Վերջին 3-5 տարիների ընթացքում Հայաստանում սայլը կարծես թե տեղից շարժվում է, իհարկե որոշ չափով: Մարդիկ պետք է հասկանան, որ սեռակրթությունը զրույց չէ սեքսի մասին, այլ դեռահասի դաստիարակության անբաժանելի մասն է»:
Aravot.am-ի հետ զրույցում հոգեբան Սիրանուշ Անդրեասյանը նշեց, որ դեռահասի մոտ կան բաց հարցեր, որոնց պատասխանները ինքը դեռ փնտրում է.
«Այդ տարիքում, եթե լինում է փոքր սթրեսային իրավիճակ, ապա երեխայի վրա շատ վատ Է անդրադառնում եւ առաջանում է ագրեսիվ վարքագիծ: Անձի ճանաչման խնդիրն է կանգնում, որը ամենակարեւորն է, սկսվում են ներքին կոնֆլիկտներ, ինչը անցանկալի չէ: Երեխան մեծանում է եւ կարիք կա ինքնահաստատվելու»:
Անժելա ՇԱՀՈՒՄՅԱՆ
