Այսօրվա դեկտեմբերի 7-ը մյուսներից տարբերվեց նրանով, որ ՀՀ Պաշտպանության նախարար Սեյրան Օհանյանի ձեռքով 33 նորակառույց բնակարանների բանալիներ հանձնվեցին զինծառայողների ընտանիքներին: Բնականաբար, կառավարությունը սրանով ցույց տվեց, որ աղետ տեսած, դեռ սգի մեջ գտնվող Գյումրիում կյանքը, այնուամենայնիվ, շարունակվում է: Բնակարանամուտը հենց այդպես էլ մեկնաբանեցին մարզի բարձրաստիճան պաշտոնյաները:
Լրագրողների հետ զրույցում Շիրակի մարզպետ Աշոտ Գիզիրյանն ասաց. «Մենք պետք է հիշենք մեր անմեղ նահատակներին, բայց դրանով պետք չէ ապրել, այլ պետք Է միայն հիշել, և ցանկանանք, որ աշխարհի ոչ մի ծայրում նմանատիպ աղետներ չլինեն: Եվ մենք պետք է կարողանանք աղետի հետևանքը վերացնել, միայն ու միայն կառուցել բնակարաններ, որպեսզի կարողանանք անօթևանների բնակեցման հարցը կարգավորել: Ես ողջունում եմ, որ Պաշտպանության նախարարը դեկտեմբերի 7-ին այցելել է Շիրակի մարզ, քաղաք Գյումրի` ոչ միայն ծաղկեպսակ դնելու համար, այլեւ բնակարանամուտ տոնելու համար»:
Աշոտ Գիզիրյանի կարծիքով, երկրաշարժից 24 տարի անց ահագին գործ Է կատարվել աղետի գոտում, և այն շարունակական բնույթ է կրում ու հասցվելու է իր ավարտին: Գյումրիում աշխատատեղերի ստեղծման հետ կապված էլ գեներալ մարզպետն ասաց. « Պետական ծրագրերից զատ, նոր քաղաքապետի հետ միասին պետք է կարողանանք շահագրգռել մեր բոլոր հայրենակիցներին, որպեսզի ներդրումներ կատարեն, և այս ձևով լուծենք աշխատեղերի հարցը» :
Աշոտ Գիզիրյանի ասելով, թեև Գյումրիում ևս 400 բնակարաններ են կառուցվելու անօթևանների համար , բայց սրանով նրանց հարցը լիովին փակված համարել չի կարելի , քանի որ ընտանիքներն այս տարիների ընթացքում աճել են. «Հետագայում, երբ որ մենք վերջացնենք բոլոր անօթևանների բնակեցման հարցը, ևս մոնիթորինգ կանցկացնենք, եթե կլինի նման հարց, այն կբարձրացնենք»,- ասաց մարզպետը:
Կարդացեք նաև
Գյումրու նորընտիր քաղաքապետ Սամվել Բալասանյանն էլ գրեթե նույնը կրկնեց, ինչ մարզպետը: « Էսօրվա օրվա մեջ խորհուրդ կա, էսօր բնակարան տրվեց 33 ընտանքիների` զինծառայողների, ես ուղղակի սա համարում եմ ոնց որ թե նոր բան, որ Գյումրին առաջ է գնում, պետք է հասկանանք, որ այո, մենք տարելիցները պետք է տոնենք, պետք է կարողանանք նշել, և նշելուց զատ պետք է առաջ շարժվենք, որպեսզի գյումրեցին հասկանա, որ կյանքը առաջ է գնում` չմոռանալով մեր անմեղ նահատակներին: Խոնարհվում եմ մեր կորցրած բոլոր անմեղ զոհերի հիշատակի առջև, և էսօր ճիշտն ասած, գիտեք, որ այս տարվա մեջ ` 2013 թվականին բնակարաններ են հանձնվելու `420 բնակարան, հիմքերը արդեն պատրաստ են, արվելու է, որպեսզի կարողանանք բանկարանային խնդիրը լուծել, որովհետև բացի դրանից ևս ունենք 1481 անօթևան»,-տեղեկացրեց քաղաքապետը: Ըստ Սամվել Բալասանյանի, քաղաքապետարանի հաշվարկներով 3900 տնակ կա Գյումրիում, թեև դրանք սկսել են պակասել, քանի որ մարդիկ տեղափոխվում են նորակառույց բնակարաններ:
Ամենալավատեսը ՀՀ պաշտպանության նախարար Սեյրան Օհանայանն էր, ով ասաց, որ կառավարությունը իր հնարավորության սահմաններում ամեն ինչ արել է Գյումրին վերականգնելու համար: «Ես մարզպետի հետ զրույցից եկա այն եզրակացության, որ Գյումրին աղետի գոտուց վերածվում է շինարարության գոտու, որովհետև շինարարության թափը այնպիսին է, որ կարծում եմ, որ մոտակա ապագայում Գյումրին կվերականգնվի իր կոլորիտով` որպես հանրապետության երկրորդ քաղաք, ոչ միայն շինարարությամբ, ոչ միայն այսօրվա ճարտարապետական լուծումներով, այլեւ Գյումրվա ժողովրդի ուրախ կենցաղով, առանձնահատկություններով»:
Նախարարը դեռ չէր ավարտել իր լավատեսական մտքերը, երբ բողոքները ձեռքերին`նրան շրջափակեցին զոհված ազատամարտիկների կանայք ու մայրեր, ովքեր տարիներ շարունակ սպասում են իրենց բնակարանների բարելավման ծրագրին, սակայն տարիներն անցնում են, ու այդպես էլ նրանց հերթը չի հասնում:Գյումրեցիներին ուրախ տրամադրություն մաղթող նախարարը, ցավոք, ոչինչ չկարողացավ խոստանալ նրանց` նշելով, 2013 թ. լուծվելու է միայն անօթևան զինծառայող ընտանքների հարցերը:
Նունե ԱՐԵՎՇԱՏՅԱՆ
