Նոյեմբերի 24-ին Տավուշի մարզի սահմանամերձ Ոսկեպար գյուղի միջնակարգ դպրոցում կայացել է տնօրենի թափուր տեղի համար մրցույթ: Տնօրենի միակ թեկնածուն՝ Ոսկեպարի դպրոցի տնօրենի ժամանակավոր պաշտոնակատար, ռազմագիտության ուսուցիչ Հարություն Ալավերդյանը հաղթել է մրցույթում:
Տավուշի մարզպետ Արմեն Ղուլարյանը, հիմք ընդունելով Ոսկեպարի դպրոցի կառավարման խորհրդի նոյեմբերի 24-ի արձանգրությունը, նոյեմբերի 28-ին որոշել է Հարություն Ալավերդյանին նշանակել «Ոսկեպարի միջնակարգ դպրոց» ՊՈԱԿ-ի տնօրենի գործադիր տնօրենի պաշտոնում եւ նրա հետ 5 տարով կնքել աշխատանքային պայմանագիր: Ոսկեպարցի ծնողները մեզ բողոքեցին, որ անցյալ շաբաթ Ոսկեպարի դպրոցի նորընտիր եւ նորանշանակ տնօրեն Հարություն Ալավերդյանը նկատել է, որ 10-րդ դասարանցիների դասասենյակի առջեւ արեւածաղկի սերմի կճեպներ են թափված: Նա հարցրել է 10-րդ դասարանցի տղաներին, թե իրե՞նք են «չրթել» արեւածաղկի սերմը: Տղաներն ասել են, որ միջանցքում տարբեր դասարանների աշակերտներ են շրջում, որ նրանք են աղոտոտել դասասենյակի առջեւ: Ոսկեպարցի ծնողները հայտնեցին,որ Հարություն Ալավերդյանը 10-րդցի տղաներին հարկադրել է ձեռքերով եւ ավելով մաքրել արեւածաղկի թափված մնացորդները: Այս կապակցությումբ զանգահարեցի Հարություն Ալավերդյանին: Նա ասաց, որ մաքրության հարցերով զբաղվում են դպրոցի հավաքարարը եւ դպրոցի տնօրենի կազմակերպչական հարցերով տեղակալը : Նա համառորեն փորձում էր ճշտել տեղեկատվության աղբյուրը, թե ով է բողոքել լրագրողիս: Նշենք, որ Հարություն Ալավերդյանը մանկավարժական կրթություն չունի, նա 2012 թ. մարտին Տավուշի մարզպետ Արմեն Ղուլարյանի կողմից դպրոցի տնօրենի պաշտոնակատար նշանակվելուց հետո անդամագրվել է Հայաստանի Հանրապետական կուսակցությանը:
Ոսկան ՍԱՐԳՍՅԱՆ
