Պաշտպանության նախարար Սեյրան Օհանյանից բացի, կառավարության որևէ այլ անդամ այսօր Գյումրի չէր ժամանել`հարգելու երկրաշարժի զոհերի հիշատակը:
Կարդացեք նաև
Ինչպես նեղվեցին Ֆրիդ Սողոյանի երկրաշարժի զոհերի հիշատակը հավերժացնող հուշարձանի մոտ հավաքված գյումրեցիները՝ «Դե էսօր աշխատանքային օր է, շատ զբաղված կլինեն: Մենք ո՞վ ենք, որ հանկարծ գան հարգեն: Ինչքան անկապ օր կա, ոչ աշխատանքային են հռչակում: Կառավարությունը բան-գործ թողած տոներ ու սգի օրեր է սահմանում, էդ ինչպե՞ս եղավ, որ դեկտեմբերի 7-ը հանկարծ աշխատանքային օր դարձավ` գիտենալով հանդերձ, որ այս քաղաքում դա հնարավոր չէ, մարդիկ գերեզմաններից տուն չեն գալիս»:
Ի դեպ, գյումրեցի օգտատերերը ևս այս հարցի շուրջ իրենց վրդովմունքն էին արտահայտել Facebook սոցիալական ցանցում, նրանցից մեկը գրել էր. «Դեկտեմբերի 7-ն է` սովորական աշխատանքային օր: Հետո ի՞նչ որ 25 -30 հազար մարդ զոհվեց: Երեւի արժեր, որ այն հիշատակի օր սահմանվեր: Ու ձևական չգային աղետի գոտի` զոհերի հիշատակին ծաղկեպսակ դնեին մտահոգ դեմքերի արտահայտությամբ: Զարգացման գոտի հռչակելու ժամանակն է երևի եկել, ինչպես հիշում եք, 10 տարի առաջ հռչակեցին ու մինչև հիմա , ինչպես ասում են` տակից դուրս չենք գալիս»:
Իսկ ՀԱԿ անդամ Վահագն Խաչատրյանն էլ իր էջում այսպես էր արտահայտել իր վրդովմունքը. «Դեկտեմբերի 7-ը իմ համար ծանր ու դաժան հիշողությունների օր է, որովհետև այս օրը կորցրեցի իմ կյանքում ամենաթանկագին էակին` մայրիկիս, ու իմ կյանքում այս օրը երբեք չի մոռացվելու: Ցավն այն է, որ այս իշխանությունները այս օրը դարձրեցին աշխատանքային օր, իսկ յուրաքանչյուր գյումրեցու համար այն չի կարող լինել աշխատանքային, քանի որ այցելում են իրենց հարազատների շիրիմներին»:
Երկրաշարժի զոհերի հիշատակին ծաղկեպսակներ էին ուղարկել Գյումրու նախկին քաղաքապետ Վարդան Ղուկասյանը, Սերժ Սարգսյանը, ՀՀ պաշտոնաթող նախագահ Ռոբերտ Քոչարյանը, որն ի դեպ, եթե անգամ չի կարողանում անձամբ գալ, ապա ամեն տարի չի մոռանում իր կողմից ծաղկեպսակ ուղարկել:
Քանի որ աղետից հետո Գյումրիում դեռ հազարավոր չլուծված հարցեր կան, տեղի բնակչությունը, բնականաբար, հավաքված սպասում էր կառավարական շատ և շատ հյուրերի, սակայն նրանց փոխարեն եկավ միայն Սեյրան Օհանյանը, որը Մսի կոմբինատ կոչվող թաղամասում զինվորականների համար նոր կառուցված շենքի բնակարանների բանալիները հանձնեց:
Նշենք, որ ի տարբերություն նախորդ տարիների, երբ դեկտեմբերի 7-ին Գյումրի էին շտապում նաև քաղաքական տարբեր ուժերի ներկայացուցիչներ, այս անգամ ոչ մեկին տեսնել չհաջողվեց, գուցե և այն պատճառով, որ ԱԺ ընտրություններն արդեն անցել են:
Իսկ նախագահի հավանական թեկնածուներից Գյումրիում էր միայն «Ժառանգություն» կուսակցության առաջնորդ Րաֆֆի Հովհաննիսյանը, որն իր բնավորությանը հավատարիմ , զոհերի հիշատակը հարգելուց հետո քայլում էր փողոցով ու անցորդների առողջությունը հարցնում:
Նունե ԱՐԵՎՇԱՏՅԱՆ
