«Լուսաստղ» ՀԿ –ի` Լոռու մարզի Վանաձոր, Թումանյան, Ալավերդի, Տաշիր, Ստեփանավան եւ Սպիտակ համայնքներում 50 խուլ եւ համրերի շրջանում անցկացրած հարցումները ցույց են տվել, որ հարցվածների 70 տոկոսը առհասարակ չի հետեւում երկրի քաղաքական գործընթացին, քանի որ դրան նպաստավոր որեւէ դաշտ չկա:
Այդ մասին այսօր հաշմանդամություն ունեցող անձանց միամսյակի շրջանակներում «Օրրան» բարեգործական կազմակերպության Վանաձորի մասնաճյուղում տեղի ունեցած «Հաշմանդամություն ունեցող անձանց հարցերով զբաղվող Լոռու մարզային հանձնաժողովի» նիստի ժամանակ ասաց «Լուսաստղ» ՀԿ փոխնախագահ Անի Գաբրիելյանը:
Անի Գաբրիելյանն ասում է, որ հարցմանը մասնակցած 50 խուլ եւ համրերի միայն 40 տոկոսն է տիրապետում սուրդո թարգմանությանը, իսկ մնացած 60 տոկոսը հաղորդակցվում է կամ ընտանիքի անդամների օգնությամբ, կամ էլ առհասարակ չի հաղորդակցվում. «Եվ մեծամասնությունը 22-23 տարեկան երիտասարդներ են: Նրանք մինչ այդ առհասարակ ընտրությունների չէին մասնակցել, իսկ այս ընտրություններին էլ մասնակցել էին ծնողների օգնությամբ»:
Վերոնշյալ հինգ համայնքներում նաեւ կազմակերպվել են հանդիպումներ ֆիզիկական խնդիրներ ունեցող անձանց ու նրանց ընտանիքի անդամների հետ. «Բացի այդ` մենք իրականացրինք նաեւ կարիքների գնահատում: Վերոնշյալ տարածաշրջաններում հաշմանդամություն ունեցող անձանց խնդիրները յուրահատուկ բնույթ են կրում: Հայտնաբերեցինք այնպիսի խնդիրներ, որոնց մասին մարզկենտրոնում դադարել են խոսել արդեն մի քանի տարի» :
Կարդացեք նաև
Նա ասում է, որ տվյալ համայնքներում տեղաշարժման դժվարություններ ունեցող երեք երիտասարդներ բացարձակապես կտրված են հասարակությունից, տնից դուրս են եկել միայն թաղամասային պոլիկլինիկա այցելելու համար.«Նրանց օրը սկսվում է տան չորս պատերի ներսում եւ ավարտվում նույն կերպ: Մեր այցելությունները արդյունք չտվին, որովհետեւ խնդիրը ունի երկկողմանի բնույթ. մի կողմից`նույնիսկ ընտանիքի անդամները պատրաստ չեն իրենց երեխային ներկայացնելու հասարակությանը, մյուս կողմից էլ երեխան, պարփակված լինելով, սովորել է այդ վիճակին եւ ունի մտավախություններ հասարակություն մտնելու համար» :
Անուշ ԲՈՒԼՂԱԴԱՐՅԱՆ
