Լոռու մարզի ընդհանուր իրավասության դատարանը 1 տարվա ազատազրկման է դատապարտել «Ռոշեն» ՍՊԸ մենեջեր Արման Բարսեղյանին: Նրա նկատմամբ ընտրվել էր խափանման միջոց` ստորագրություն քաղաքից չբացակայելու մասին:
Նա այս տարվա ապրիլի 7-ին, Սուրբ Զատիկի տոնակատարության հետ կապված, իր ավտոմեքենան փորձել է կայանել եկեղեցու բակում: Արմանի հետ էին իր ընկերները՝ Վալտեր Սողոյանն ու Մերուժան Գալոյանը:
Եկեղեցու բակում հերթապահություն իրականացնող , գործով տուժող Բազումի օպեր-լիազոր Վահե Բարսեղյանն արգելել է մեքենան կանգնեցնել բակում:
Ըստ քրեական գործի նյութերի, Արման Բարսեղյանը սպառնացել է «սատկացնել» ոստիկանին, մեքենան կանգնեցնել իր ուզած տեղում: Սակայն ոստիկանը թույլ չի տվել եւ Արմանի դեմ հարուցվել էր քրեական գործ՝ իշխանության ներկայացուցչի դեմ ոտնձգություն կատարելու համար:
Կարդացեք նաև
Լոռու մարզի ընդհանուր իրավասության դատարանում ընթացած դատական նիստի ժամանակ Արմանը չի ընդունել իրեն մեղսագրվածը, ասել է, որ ոստիկանն ամեն ինչ անում էր վեճի մեջ մտնելու համար, որ ինքն ընդամենն ասել է.«եթե պագոններդ վրադ չլինեին, ուրիշ կերպ կխոսեի», իսկ ոստիկանն ասել է.«Դե, խոսա, այ, լակոտ» վիրավորական արտահայտությամբ:
Ոստիկանը նաեւ ասել էր, թե Արմանը մեքենան քշել էր իր ուղղությամբ:
Դատարանը ազատազրկման ձեւով պատիժ է սահմանել, ինչը Ա.Բարսեղյանը կբողոքարկի ՀՀ քրեական եւ զինվորական գործերով վերաքննիչ դատարանում:
Մեր տեղեկություններով բողոքը գտնվում է դատավոր Արմեն Դանիելյանի վարույթում:
Ռուզան ՄԻՆԱՍՅԱՆ
