Կառավարությունը ԱԺ քննարկման է ներկայացրել «Ընդերքի մասին» օրենսգրքում լրացում կատարելու մասին օրինագիծը: Անգամ ՀՀԿ պատգամավոր Վարդան Այվազյանը, լինելով նախկին նախարար, օրինագծից բան չէր հասկացել:
ՀՀԿ պատգամավոր Մարգարիտ Եսայանը խնդրեց, «որպես հարուստ կենսափորձ ունեցող պաշտոնյա», իրենց բացատրել՝ ի՞նչ նպատակ ունի այդ նախագիծը: Վարդան Այվազյանը բացատրեց. «Թե օրենսդրական տեխնիկայի առումով ինչ են փորձել անել՝ ինձ համար շատ վիճահարույց է»: Այս նախագծով անհատ ձեռնարկատերերին տրվում է ընդերքն օգտագործելու իրավունք, ինչին ՀՀԿ պատգամավորները համաձայն չէին ու պահանջում էին հիմնավորում, քանի որ հանձնաժողովում այն արդեն քննարկվել էր:
Վարդան Այվազյանն այնքան շեշտեց, որ իր համար անհասկանալի է, մինչեւ ԱԺ նախագահ Հովիկ Աբրահամյանը նկատեց. «Պարտավոր եք հասկանալ ու մեզ բացատրել: Ի՞նչ է նշանակում հայտնի չի, հարցական է…: Մեզ հիմնավորեք՝ օգուտ տալի՞ս է սա բյուջեին, թե՞ անձնական, մարդկանց հարցեր են լուծում»:
Կարդացեք նաև
Մարգարիտ Եսայանն իր ելույթում մտահոգություն հայտնեց. «Ինչպես Գալուստ Գրիգորիչն է ասում՝ սրա մեջ լիրիկա չկա, բայց խորքում այս օրինագծի հետ կապված բավականին լուրջ լիրիկա կա: Ճիշտ կլինի, որ արդյունքում ունենանք ճիշտ պատկերը: Ի՞նչ է նշանակում անհատ ձեռներեցներին նույնպես տալ ընդերքն օգտագործելու իրավունք: Այնտեղ հատուկ նշվելո՞ւ է, որ պետք է լինեն անպայման ՀՀ քաղաքացիներ, փորձ ունենան այս ոլորտում: Մենք տեսնում ենք, որ մեզանում քաղաքացիական հասարակությունը բավականին ակտիվ է, հատկապես ընդերքի, բնապահպանական խնդիրների հետ կապված շատ լավ հարցեր է առաջադրում: Չունե՞ք համապատասխան առաջարկ այն մասին, թե ինչպես անենք, որ ընդերք օգտագործողները մեր երկրի բնական պաշարները չօգտագործեն այնպես, որ դա առաջացնի քաղաքացիական հասարակության, մեր դժգոհությունն ու վրդովմունքը: Ճիշտ կլինի հասկանանք այն տրամաբանությունը, որով կառավարությունն այստեղ է ներկայացել՝ իր փոփոխություններով»:
Վարդան Այվազյանի խոսքերով՝ «Փորձեմ իմ հարուստ փորձի հմտությունները մանրամասնել: Ասեմ, ինձ իսկականից օրենքը անհասկանալի է»:
Հռիփսիմե ՋԵԲԵՋՅԱՆ
