«Ուոլ սթրիթ ջորնալ»-ը հրապարակել է Ադրբեջանի արտաքին գործերի նախարար Էլմար Մամեդյարովի հայտարարությունը, որտեղ ասվում է, որ այս շաբաթվա վերջում Եվրոպայի Անվտանգության և Համագործակցության Կազմակերպությունը կհավաքվի Դուլբինում՝ իր ամենամյա նախարարական հանդիպման համար: «Ես լիահույս եմ, որ իրական առաջընթաց կգրանցենք մեր տարածաշրջանում ծառացած որոշ հիմնահարցերի լուծման համար, մասնավորապես Հայաստանի և Ադրբեջանի միջև ձեռք կբերվի տևական խաղաղություն:
Ադրբեջանը շնորհիվ նավթի և գազի վերելքի տնտեսապես զարգացած երկիր է, սակայն ժամանակակից երկիր կառուցելու մեր ջանքերին խոչընդոտում են մեր անվտանգության հարցերի շուրջ եղած խնդիրները: Կասպյան տարածաշրջանը տառապում է լարվածությունից, որը կարող է քաղաքական հակամարտությունից արագ վերաճել բաց հակամարտության: Իմ երկրի համար ամենանյարդային և վնասակար խնդիրը հարևան Հայաստանի հետ Լեռնային Ղարաբաղի հարցն է»:
Հայտարարության շարունակությունում, Մամեդյարովը ներկայացնելով Ղարաբաղի հետ կապված ադրբեջանական տեսակետն ու անփոփոխ դիրքորոշումը, խոսում է խաղաղության կարևորության մասին և կոչ է անում հայ գործընկերներին օգտվել Դուբլինում խաղաղության հասնելու հնարավորությունից:
Պատրաստեց Հովհաննես ԻՇԽԱՆՅԱՆԸ
