«Ադրբեջան պետությունը դա իսկապես նացիստական ցեղապաշտական գոյակցություն է, որտեղ հայ լինելը, հայկական ծագում ունենալը համարվում է հանցագործություն: Եթե անգամ Ֆիլիպինների քաղաքացին գա Ադրբեջան ու պարզվի, որ հայկական ազգանուն ունի, թեկուզ ինքն էլ տեղյակ չլինի ու Հայաստանի մասին անգամ քարտեզով չիմանա, նրան նույնիսկ այդ դեպքում կնստեցնեն ինքնաթիռ ու հետ կուղարկեն: Ցանկացած միջոցառում, որին հայկական ազգանունով մարդ է լինում՝ բոյկոտվում է: Սաֆարովի դեպքը ցույց է տալիս, որ հային ցանկացած ձեւով սպանելը հերոսություն է, այստեղ լուրջ ինստիտուտներ են աշխատում, որոնք համոզում են, որ կա համաշխարհային հայկական դավադրություն, դրանք բացարձակապես կապկում են նացիստական հակահրեական պրոպագանդան, պարզապես հրեա բառը փոխարինելով հայ բառով: Իսկ ինչպե՞ս է լուծվում հրեական հարցը նացիստի կողմից՝ բոլորս էլ գիտենք: Ադրբեջանը փաստացի դոմինանտ մեկ կուսակցությունով պետություն է եւ այդ ամբողջ նացիստական քաղաքականությունը կրում է «Ենի Ադրբեջան» կուսակցությունը»,-լրագրողների հետ հանդիպման ժամանակ ասաց բլոգեր Արմեն Հովհաննիսյանը՝ դատապարտելով Սանկտ Պետերբուրգում կայացած «Եվրասիական ինտեգրումը 21-րդ դարում» միջազգային միջկուսակցական համաժողովին ՀՀԿ-ի մասնակցությունը:
Եվրասիական միության մեջ մտնելը, ըստ Հովհաննիսյանի, պատիվ չի բերում որեւէ քաղաքական ուժի, առավել եւս այնպիսի մեկի, որը գտնում է, թե պատասխանատվություն է կրում Հայաստանի համար: Բացի այդ՝ «Իսկ ո՞վ է հարցրել մեր քաղաքացուն, ո՞վ է քննարկել, թե որքանո՞վ է դա համապատասխանում մեր շահերին: Ի՞նչ է Եվրասիական միությունը, երբեւէ դա մեր մոտ քննարկվե՞լ է, որ իմանանք: Ինչո՞ւ են մեզ անպայման ուզում մտցնել ինչ -որ միությունների մեջ: Փաստորեն՝ անպայման ուզում են այնպես անել, որ մեր ճակատագիրը որոշենք ոչ թե մենք, մեր ընտրված ներկայացուցիչների միջոցով, այլ որոշեն ուրիշ մայրաքաղաքներում»,-ավելացրեց Հովհաննիսյանը, նշելով, որ ինքն այդ ամենի իմաստը հասկանում է, բայց համարում՝ շատ վտանգավոր:
Եվա ՀԱԿՈԲՅԱՆ
