«Սպիտակի աղետալի երկրաշարժից անցել է 24 տարի: Մենք ապրում ենք սեյսմակայուն գոտում, որը ամեն տարի մեզ մոտեցնում է հաջորդ ուժեղ երկրաշարժին: Դա բնածին երեւույթ է, որից չենք կարող խուսափել: Պետք է ամեն ինչ անել՝ սեյսմիկ ռիսկը նվազեցնելու համար»,-այսօր լրագրողների հետ հանդիպման ժամանակ նշեց Սեյսմիկ պաշտպանության ազգային ծառայության գործակալության պետ Հրաչյա Պետրոսյանը:
Նրա համոզմամբ՝ այսօր կառուցվում են ավելի որակյալ շենքեր, կազմակերպվում են քննարկումներ եւ հանդիպումներ, որպեսզի ազգաբնակչությունը իրազեկված լինի.
«Այս բոլորը սեյսմիկ ռիսկի նվազեցման կարեւոր բաղադրիչներից են: Երկրաշարժի ժամանակը չի երեւում, նրա կանխատեսումը ունի երկարաժամկետ ու կարճաժամկետ բնույթ, եթե կարողանանք կանխատեսել երկրաշարժը, ապա կունենանք քիչ մարդկային զոհեր»:
Կարդացեք նաև
Բանախոսի պնդմամբ, Գյումրի քաղաքում այսօր կառուցվում են որակյալ շենքեր, որտեղ մարդիկ ապրում են.
«Երկրաշարժի ժամանակ բազմաթիվ շենքեր փլուզվեցին, մի մասն էլ վերացման էր ենթակա: Այն, ինչ պետք է քանդեինք՝ քանդել ենք: Օրենսդրական դաշտը մշակվում եւ լրացվում է, սակայն բավարար ֆինանսավորում չունենալու պատճառով քայլերը դեռ շարունակվում են»:
Հրաչյա Պետրոսյանը կարծում է, որ կառավարությունը մտահոգ է այս հարցերով, սակայն օգնության համար դիմում ենք ասիական զարգացման կենտրոնին, սփյուռքահայ խոշոր կազմակերպություններին, ճապոնական կառավարությանը, նրանք աջակցում են թե ֆինանսապես, թե տեխնիկապես:
Անժելա ՇԱՀՈՒՄՅԱՆ
