«Միայն ներկուսակցական քննարկումների եւ կուլիսային պայմանավորվածությունների արդյունքում չի կարելի հաջողության հասնել նախագահական ընտրություններում»,- ասաց ՀՅԴ Հայաստանի Գերագույն մարմնի փոխներկայացուցիչ Արսեն Համբարձումյանը՝ բացելով «Միասնական օրակարգ՝ նախագահական ընտրություններ» համաժողովը: Նա հիշեցրեց, որ ՀՅԴ-ն քաղաքական ուժերի հետ կոնսուլտացիաների փուլ արդեն անցել է որոշ կուսակցությունների հետ, այժմ կարեւորում է արտախորհրդարանական ուժերի եւ հասարակական սեկտորի կարծիքը:
Արսեն Համբարձումյանն ասաց, որ ՀՅԴ-ն պատրաստ է ստանձնել պատասխանատվության իր բաժինը, հիմա խոսքը մնում է մյուս ուժերին:
ՀՅԴ Հայաստանի ԳՄ ներկայացուցիչ Արմեն Ռուստամյանն իր ելույթում նույնպես նկատեց, որ Հայաստանի հաջողության միակ գրավականը քաղաքական ուժերի համախմբումն է: «Հայաստանի նախագահը պետք է կասեցնի այս կործանարար ընթացքը»,- հայտարարեց Ռուստամյանը, ընդգծելով, որ պետք է վերջ դրվի անձը, կուսակցությունը եւ պետությունը նույնականացնելու իրողությանը:
Ռուստամյանը նաեւ ասաց, որ ի վերջո պետք է վերջ տրվի անձերին համեմատելու արատավոր երեւույթին եւ համախմբումը կայացնել գաղափարների շուրջ:
Կարդացեք նաև
Համաժողովին ներկա են ԲՀԿ-ի, ՀԱԿ-ի, «Ժառանգության» եւ ԱԻՄ-ի ներկայացուցիչները:
Նելլի ԳՐԻԳՈՐՅԱՆ
