Այսօր «Էրեբունի» հյուրանոցում Հայ Յեղափոխական Դաշնակցությունը հանրային քննարկում է կազմակերպել՝ «Միասնական օրակարգ՝ նախագահական ընտրություններ» թեմայով:
ՀՅԴ-ն գտնում է, որ 2013-ի փետրվարին կայանալիք նախագահական ընտրությունները ՀՀ անկախ պետականության անցած ճանապարհը վերաիմաստավորելու, երկրի եւ հասարակության խնդիրները ճիշտ ձեւակերպելու, ժողովրդի բարեկեցությունն ապահովագրող գործողություններ նախանշելու եւ արտաքին մարտահրավերներին արժանապատվորեն դիմակայելու բացառիկ հնարավորություն են: Ըստ այդմ, Դաշնակցությունն առաջարկում է 7 կետից բաղկացած օրակարգ.
1. Ստեղծել ժողովրդի ազատ կամարտահայտությամբ իշխանության ձեւավորում ու փոփոխությունը երաշխավորող ընտրական համակարգ՝ բացառելով ընտրակաշառքը, պետական վարչական ռեսուրսի օգտագործումը, անցում կատարել խորհրդարանի 100%-անոց համամասնական սկզբունքին:
2. Մինչեւ 2015-ի ավարտը նախաձեռնել սահմանադրական փոփոխություններ՝ կառավարման խորհրդարանական համակարգին անցնելու նպատակով:
Կարդացեք նաև
3. Իշխանությունը վերահսկելու եւ հավասարակշռելու նպատակով՝ օրենքով երաշխավորված գործուն լծակներ տրամադրել ընդդիմությանը՝ քաղծառայության խորհրդի, տնտեսական մրցակցության պաշտպանության եւ հանրային ծառայությունը կարգավորող հանձնաժողովների, ստեղծվելիք հակակոռուպցիոն գործակալության ղեկավարումը վերապահել ընդդիմությանը:
4. Հստակ տարանջատել բիզնեսն ու քաղաքականությունը, ապահովել դատական իշխանության լիարժեք անկախություն, արմատական փոփոխության ենթարկել տնտեսական քաղաքականությունը՝ նպատակ դարձնելով նոր աշխատատեղերի ստեղծումը, արժանապատիվ վարձատրությունը եւ աղքատության վերացումը:
5. Ամրագրել պետության կազմակերպիչ-կարգավորիչ դերակատարությունը հավասար հնարավորություններով հասարակության կայացման բարիքների ստեղծման եւ դրանց բաշխման արդարությունը ապահովելու գործում: Սոցիալական քաղաքականության հիմքում դնել կենսապահովման նվազագույն բյուջեի մեծությունը:
6. Արտաքին քաղաքականության մեջ որդեգրել ազգային-պետական այնպիսի ուղեգիծ, որի գերխնդիրն է հայկական պետության անկախության, անվտանգության եւ ինքնուրույնության ապահովումը:
7. ԼՂՀ-ի եւ ՀՀ-ի միջեւ կնքել ռազմաքաղաքական դաշինք, բանակցություններում ապահովել ԼՂՀ կարգավիճակի եւ անվտանգության առաջնայնությունը, ետ կանչել ՀՀ ստորագրությունը հայ-թուրքական արձանագրություններից եւ այդ երկրի հետ հարաբերությունները կարգավորել ելնելով ազգային անվտանգության ռազմավարությունից, չվտանգելով պատմական արդարության վերականգնման հեռանկարը:
ՀՅԴ-ն վստահ է, որ այս հիմնախնդիրների ճիշտ ձեւակերպումը արդեն գործի կեսն է եւ ակնակալում են, որ քաղաքական ուժերն ու հասարակությունը կհամախմբվեն այդ պլատֆորմի շուրջ:
Նելլի ԳՐԻԳՈՐՅԱՆ
