Իջեւան քաղաքի կյանքում հիշարժան իրադարձություն է. մարզկենտրոնի Անկախության փողոցում տեղադրվել է փողոցային երթեւեկությունը կարգավորելու լուսացույց: Զարմանալի է, որ 20 հազար բնակչություն,ավտոմեքենաների մեծ շարժ ունեցող Իջեւանում մինչ այժմ լուսացույց չկար, իսկ սահմանամերձ, 8 հազար բնակիչ ունեցող Բերդի կենտրոնում գործում է 2 լուսացույց:
Իջեւանի քաղաքապետարանը «Քաունթերփարթ ինտերնեյլնշլ» կազմակերպության աջակցությամբ, բացի այդ լուսացույցը տեղադրելուց, նաեւ երթեւեկության կարգավորման այլ աշխատանքներ է կատարել. քաղաքի երկու հատվածներում տեղադրվել է դեղին թարթող լուսանշան, մարզպետարանի առջեւի հրապարակում խաչմերուկի գծանշումներ են արվել: Սակայն իջեւանցի վորորդների մեծամասնությունը դեռ սովոր չէ լուսացույցին, խախտվում են երթեւեկության կանոնները, քաղաքում ավտոմեքենաներից զատ նաեւ կովեր, ձիեր եւ ձիավորներ են շրջում: Քաղաքի կենտրոնում`շուկայի մոտ, ուր միշտ խցանումներ են լինում, չկա լուսացույց, հետիտոնի անցման գոտի: Նախկինում քաղաքապետարանը Անկախության փողոցում եւ դրան հարակից փողոցներում ասֆալտի շերտի 5 հատ թեքություն է կառուցել,որոնց բնակչությունը «պառկած միլիցա» է կոչում: Ե՞րբ կվերացվեն փողոցի ասֆալտն աղճատող այդ թեքությունները: Իջեւանի քաղաքապետ Վարդան Ղալումյանը մեր հարցին ի պատասխան ասաց, որ ինքն այժմ բարեկամական այցով Ֆրանսիայի Վալանս քաղաքում է գտնվում, վերադառնալուց հետո կպատասխանի հարցապնդմանը:
Ոսկան ՍԱՐԳՍՅԱՆ
