Մի քանի օր առաջ կաթողիկոսը Շիրակի մարզը բաժանեց երկու թեմերի` ստեղծելով Արթիկի թեմ ու հոգևոր առաջնորդ նշանակելով իր ոսկեվազցի համագյուղացուն` Մայր աթոռի միջեկեղեցական հարաբերությունների բաժնի պատասխանատու Հովակիմ եպիսկոպոս Մանուկյանին: Փաստորեն Վեհափառը կիսեց Շիրակի թեմի առաջնորդ Միքայել եպիսկոպոսի հոգևոր պաշտոնը` նրա տիրակալությունից վերցնելով Արթիկը` իր հարակից 23 գյուղերով:
Մայր Աթոռի մամուլի ծառայության տարածած հաղորդագրության մեջ նպատակը մեկնաբանվում է այսպես. «Այսօր Արթիկի տարածաշրջանի եկեղեցական համայնքները ևս անհրաժեշտությունն ունեն համախմբվելու որպես մեկ թեմ, որպեսզի եկեղեցավարչական գործունեութեան առավել արդյունաւոր կազմակերպմամբ առավելագույնս հոգացվեն հոգևոր կարիքները Մեր զավակների և մատուցվող մշտական պաշտամունքով, Տիրոջ խոսքի մշտահունչ քարոզությամբ զորանա ու պայծառանա նրանց հոգևոր կյանքը, նրանց սրտերում անսասան մնան հավատարմությունն ու նախանձախնդրությունը մեր Սուրբ Եկեղեցու և նվիրական արժեքների հանդեպ»:
Շիրակի թեմի առաջնորդ Միքայել Աջապահյանն էլ www.civilnet.am- ին տված հարցազրույցում ամենևին չնեղվեց, բնական ընդունեց այդ որոշումը` ասելով, որ սա արվում է արդյունավետությունը բարձրացնելու համար, և որ ինքը հնազանդ է կաթողիկոսի որոշմանը:
Սակայն նրա փոխարեն անչափ նեղված են գյումրեցի հավատացյալները: Facebook սոցիալական ցանցի «Լեննագանցիք» ու «Նոր Գյումրի» խմբերում թեժ քննարկումներ են ընթանում այս թեմայով: Օգտատերերի գերակշռող մասը, բացարձակապես ուշադրություն չդարձնելով ու չհավատալով պաշտոնական պարզաբանման անկեղծությանը, իրենց վրդովմունքն են արտահայտում կաթողիկոսի որոշման դեմ: Օրինակ, նրանցից մեկը` Էդվարդ Հակոբյանը, գրել էր . «Գրողը տանի … Գոնե էստեղ քաղաքականությունը իրա պըլընջոտ, կեղտոտ քիթը չմտցներ … » : Ի պատասխան վերջինիս` Սերգեյ Գաբրիելյանը այսպես էր արձագանքել . «Էսպես գնաց երկու մարզպետ էլ կունենանք»: Քննարկմանը մասնակցող մեկ այլ օգտատեր` Նարեկ Դշխունյանն էլ իբրև թե միամտաբար հարցրել էր . «Ժողովու՛րդ, իսկ խաբա՞ր եք` Մարալիկի համա՞յնքն էլ է մտել Արթիկի թեմի մեջ», որին ի պատասխան թատերագետ, լրագրող Լևոն Մութաֆյանը հեգնել էր. «Երևի շուտով Մարալիկի թեմ էլ ստեղծվի, եթե, իհարկե, էլի մի ոսկեվազցի կամ ապարանցի եպիսկոպոս հայտնվի,,… »:
Կարդացեք նաև
Օգտատերերը հիշել են նաև խորհրդային տարիները, երբ ինչ-որ մեկին շտապ ռայկոմի քարտուղարի պաշտոն է պետք եղել, գնացել են Կրեմլ ու ռայկոմը կիսել տվել, օրինակ` այդպես են ձևավորվել նախկին Լենինականի «Մոսկովյան» և «Շիրակի» շրջաննների ռայկոմները :
«Ասպարեզ» ակումբի նախագահ Լևոն Բարսեղյանն էլ այսպես էր արձագանքել. «Էս ազգս աճում է հա՞ երեւի, տեղյակ չենք, թե՞ Էջմիածնից լավ է երեւում: Ավելի լավ չէ՞ր լինի Շիրակի մարզում միանգամից երկու թեմակալ առաջնորդ սահմաներ …. շատ անհաջող որոշում է: Իսկ Ալավերդու թեմ չի՞ ուզում առանձնացնել Վեհափառը, իսկ Դաստակերտի՞, բա Ճամբարակի …. Նիժնի Տագիլի թեմ …. »
Նունե ԱՐԵՎՇԱՏՅԱՆ
«Ասպարեզ» ակումբի նախագահի դիտարկումներն այս թեմայի շուրջ ընթերցեք վաղվա տպագիր «Առավոտում»:
