Սյունիքի մարզի գյուղական համայնքներում օրենքի չափանիշներին համապատասխան եւ անհրաժեշտ մասնագիտական փորձ ունեցող կադրերի բացակայության խնդիր կա:
Սյունիքի մարզպետարանի աշխատակազմի տեղական ինքնակառավարման եւ հանրապետական գործադիր մարմինների հարցերով վարչության պետ Սեյրան Ավետիսյանի խոսքով` 2008թ.-ին մարզի 78 համայնքներում օրենքով սահմանված չափանիշներին չհամապատասխանելու պատճառով, աշխատակազմերի քարտուղարներին հնարավոր չեղավ նշանակելու համայնքային ծառայության պաշտոններում: Տվյալ համայնքներում թափուր կադրերի համալրման նպատակով հայտարարվել էին մրցույթներ, սակայն դրանք կայացել են ընդամենը 37 համայնքներում, իսկ գյուղական 41 համայքներում կադրերի դիմումների բացակայության պատճառով աշխատակազմերի մրցույթներ չեն կայացել: Նմանատիպ խնդիր կար ոչ միայն Սյունիքի մարզում, այլեւ` հանրապետության գրեթե բոլոր սահմանամերձ փոքր համայնքներում:
«Ստեղծված իրավիճակի շտկման նպատակով «Համայնքային ծառայության մասին» ՀՀ օրենքներում կատարվել են փոփոխություններ, որոնց արդյունքում հնարավոր եղավ ժամանակավորեպես` մինչեւ 2015թ.-ի հունվարի 1-ը, իջեցնել օրենքով սահմանված բարձրագույն կրթության եւ աշխատանքային ստաժի չափանիշները: Արդյունքում համալրվեցին այդ պաշտոնները, սակայն այն ունի ժամանակավոր բնույթ` մինչեւ 2015թ.-ի հունվարի 1-ը: Ներկայումս մարզում առկա է իջեցված չափանիշներով աշխատակազմի քարտուղարի 51 պաշտոն: Կատարված դիտարկումների արդյունքում պարզվել է, որ նշված պաշտոնները զբաղեցրած քարտուղարները քայլեր չեն ձեռնարկում բարձրագույն կրթություն ստանալու ուղղությամբ», – նշեց Սեյրան Ավետիսյանը եւ տեղեկացրեց, որ համապատասխան քայլեր չձեռնարկելու դեպքում` 2015թ.-ին կստեղծվի նույն իրավիճակը եւ նախորդ անգամվա պես տվյալ անձինք կազատվեն զբաղեցրած պաշտոններից:
Երեւույթից խուսափելու համար պարոն Ավետիսյանը խորհուրդ տվեց համայնքների ղեկավարներին կադրերին հիշեցնելու բարձրագույն կրթություն ստանալու անհրաժեշտության մասին, հակառակ դեպքում` տվյալ պաշտոնների համար հեռանկարային կադրերի համալրման աշխատանքներ տանել:
Մերի ՍՈՂՈՄՈՆՅԱՆ
