Նովգորոդ երկրամասի երեխաների իրավունքների պաշտպան Ելենա Ֆիլինկովան «Վաշի նովոստի» թերթին պատմել է մի հայաստանցու տխուր ճակատագրի մասին:
2005թ. մայր և դուստր Իսկանդարյանները մեկնել էին Նովգորոդի երկրամասի Բոռովիչ քաղաք` մշտական բնակության:
2007թ անբուժելի հիվանդությամբ տառապող մայրը եկել էր Հայաստան, բայց այլևս չէր կարողացել հետ գնալ: Հայաստանում ծանոթները հեռախոսով են հաղորդել Մարիամին, որ մայրը մահացել է: Մահը հաստատող ոչ մի փաստաթուղթ նրան ոչ ոք չէր ուղարկել:
Մարիամը Ռուսաստանում բացի մորից ուրիշ ոչ մի ազգական չուներ: 16 տարեկանում նա լրիվ մենակ էր մնացել: Բացի այդ, 2009թ. նա երեխա է ունենում: Նրան տրամադրել էին հանրակացարան: Սակայն 2011թ. նա կրկին ոչ մի միջոց չի ունենում և’ հանրակացարանի վարձը մուծելու, և’ երեխային պահելու համար:
Մարիամը դիմել էր երեխաների իրավունքների պաշտպանության հանձնակատարին: Բարձրացվեց Մարիամին որբի կարգավիճակ տալու հարցը, չնայած Մարիամը փաստացի ծնողազուրկ էր, սակայն դա ապացուցելը հեշտ չէր: Հանձնակատարը հարցումներ էր ուղարկել ՌԴ արտաքին գործերի նախարարություն, Հայաստանի հյուպատոսություն և հավաքել բոլոր անհրաժեշտ փաստաթղթերը մոր մահը ապացուցելու համար:
Անցած շաբաթ Բոռովիչի շրջանի դատարանը հաստատել է Մարիամի որբ լինելու փաստը: Այժմ նա արտահերթ բնակարան ստանալու իրավունք ունի:
Բացի այդ սոցիալական ծառայությունները օգնել են Մարիամին տեղավորվել լավ վարձատրվող աշխատանքի:
Պատրաստեց Հովհաննես ԻՇԽԱՆՅԱՆԸ
