Ավան եւ Նոր Նորք վարչական շրջանների ընդհանուր իրավասության դատարանում այսօր շարունակվեց «Հարսնաքար» ռեստորանային համալիրում հունիսի 17-ին բռնարարքի գործով հերթական դատական նիստը: Ավարտվեց երրորդ տուժողի՝ Էդգար Նիկոյանի հարցաքննությունը:
Սկսվեց չորրորդ տուժողի՝ Արկադի Աղաջանյանի հարցաքննությունը: Նախորդ տուժողի՝ Է. Նիկոյանի հետ կապված հրապարակվեց ամբաստանյալ Արման Խաչատրյանի՝ նրան ճանաչման ներկայացնելու, ինչպես նաեւ առերեսման արձանագրությունները: Այդ ժամանակ տուժողն ասել էր. «Իրեն մատնացույց արված տղամարդը վիճաբանության, ծեծկռտուքի ժամանակ հանգիստ կանգնած էր»:
Ամբաստանյալի պաշտպան Ավագ Լալայանին հետաքրքրում էր, թե ինչու երկու օր հետո նա ասել էր, թե իր պաշտպանյալը հանգիստ կանգնած էր, իսկ դատարանում այդ մասին նա չի հայտնում: Նույն հարցը հետաքրքրեց նաեւ ամբաստանյալ Արման Բաղդասարյանի պաշտպան Միհրան Պողոսյանին: Նա հարցնում էր՝ ում է նկատի ունեցել տուժողը, երբ նախաքննության ժամանակ հայտնել է, որ Խաչատրյանի ընկերները ծեծի են ենթարկել իրեն եւ իր ընկերներին: Արդյոք դա ենթադրությո՞ւն չէ. եթե տուժողը չի ծեծել, ո՞վ ում է ծեծել: Մի քանի անգամ տուժողը կրկնեց, որ դեմքերը չի տեսել, որ տեսել է շարժում:
Կարդացեք նաև
Միհրան Պողոսյանը տարբեր շեշտադրումներով շարունակեց իր հարցերը, ասելով. «Եթե Արման Բաղդասարյանը ձեր տեսադաշտում չի եղել, ձեր կարծի՞քն է, որ նա է ձեզ ծեծի ենթարկել», կամ՝ «ձեր պատկերացմա՞մբ է, որ Արման Բաղդասարյանը ձեզ ծեծի է ենթարկել»: Դատավորը երբ փորձեց հարցը հանել, պաշտպանը առարկեց դատարանի գործողությունների դեմ, ասելով, թե նախագահողը խոչընդոտում է արդարադատության իրականացմանը:
Ամբաստանյալ Գարիկ Մարգարյանի պաշտպան Մարինե Թովմասյանը հանդես եկավ կարճ հայտարարությամբ, ասելով, որ եթե տուժողը չի տեսել 6 ամբաստանյալներին, ապա ինչո՞ւ է տվել այդ տղաների անունները: Ապա նկատեց, որ եթե 6 ամբաստանյալները չներկայանային իրավապահներին՝ որոշակի տեղեկություններ հաղորդելու նպատակով, չէին ձերբակալվի եւ եթե 50-60 անձինք ներկայանային իրավապահներին, ապա նրանց էլ կձերբակալեին:
Չորրորդ տուժող Արկադի Աղաջանյանի ցուցմունքը չհետաձգվեց՝ աշխատանքային ժամի ավարտի հետ կապված, քանի որ դրան դեմ արտահայտվեցին ամբաստանյալների պաշտպանները:
Հիշեցնենք, որ ռազմական բժիշկները Արկադի Աղաջանյանի ծննդյան օրվա կապակցությամբ են եղել «Հարսնաքար» ռեստորանային համալիրում:
Ռուզան ՄԻՆԱՍՅԱՆ
