Հունգարիան Ադրբեջանին համարում է Եվրոպայի էներգետիկ անվտանգության երաշխավոր։ Այդ մասին այսօր Բաքվում հայտարարել է Հունգարիայի վարչապետի գրասենյակի պետքարտուղար, հունգարա – ադրբեջանական միջկառավարական տնտեսական հանձնաժողովի համանախագահ Պետեր Սիյարտոն։
«Թրենդ» լրատվական գործակալության փոխանցմամբ` Սիյարտոն լրագրողների հետ զրույցում ասել է, որ հունգարական կողմը շահագրգռված է Nabucco գազատարի նախագծի իրականացմամբ եւ այդ խողովակաշարով ադրբեջանական գազի` Կենտրոնական Եվրոպա առաքմամբ։
Միաժամանակ, նա նշել է, որ էներգետիկ մեկ այլ` AGRI (Azerbaijan-Georgia-Romania Interconnector) նախագծի զարգացումը «այնքան արագ տեմպերով չի ընթանում, որքան ակնկալվում էր»։
AGRI ծրագրին, որով նախատեսվում է սեղմված գազը Ադրբեջանից Վրաստանի տարածքով տեղափոխել Ռումինիա, այս փուլում մասնակցում է չորս պետություն` Վրաստանը, Ռումինիան, Հունգարիան եւ Ադրբեջանը։ Այստեղ դեռեւս հստակեցված չէ նույնիսկ պահանջվող ներդրումների ծավալը։
Կարդացեք նաև
«Տվյալ նախագծի իրականացման տեմպերի արագացումը կախված է անմիջականորեն մասնակից երկրներից», – ընդգծել է Պետեր Սիյարտոն։
Ադրբեջանական լրատվամիջոցները հաղորդում են նաեւ, որ այսօր Բաքվում հունգարա – ադրբեջանական գործարար հանդիպում է անցկացվում։
«Ազատություն» ռադիոկայան
