«Երեխաս 3 տարի է, ինչ հիվանդ է, իսկ Հայաստանում չի բուժվում նման հիվանդությունը: Այս միջոցառումը կազմակերպվել է, որպեսզի հավաքվի անհրաժեշտ գումար եւ երեխաս փրկվի»,-այսօր Aravot.am-ի հետ զրույցում նշեց արյան քաղցկեղով հիվանդ 6-ամյա Նարեկի հայրը՝ Արայիկ Մարտիրոսյանը:
Նրա պնդմամբ՝ 9 ամիս բուժումից հետո Նարեկը ստացել է ճառագայթային բուժում, սակայն հիվանդությունը կրկնվել է.
«Ակնկալում եմ աջակցություն այն մարդկանցից, ովքեր հնարավորություն ունեն օգնելու: Նարեկը շատ հաճախ չի շփվում իր հասակակիցների հետ, քանի որ նրան դա չի թույլատրվում, ցանկացած պահի նա կարող է վիրուս վերցնի, ինչը միայն վնաս է»:
Նարեկը հիվանդ է արյան քաղցկեղով: Մոսկվայում բժշկական զննություններից հետո ռուս մասնագետները նշանակել են ոսկրածուծի փոխպատվաստում: Վիրահատությունն արժե 120-130 հազար եվրո: Գումար գտնելու հույսով մի շարք անհատներ համախմբվել են Նարեկի կյանքը փրկելու համար՝ «Դու հաստատ կապրես» կարգախոսով: Կարգախոսին համանուն գրվել է նաեւ երգ, նկարահանվել՝ տեսահոլովակ: Տեղի ունեցավ նաեւ «Դու հաստատ կապրես» երգի տեսահոլովակի պրեմիերան, որը նվիրված էր արյան քաղցկեղով հիվանդ 6-ամյա Նարեկ Մարտիրոսյանի փրկությանը:
Երգահան, գործիքավորող Հարութ Տեր-Հովակիմյանը՝ Derhova-ն, համարեց, որ անիմաստ կլիներ, եթե ինքը չհամաձայներ օգնել Նարեկին.
«Մեծ հաճույքով եմ արել: Նարեկի հետ հանդիպեցի տեսահոլովակի նկարահանման ժամանակ: Նրա պայծառությունը ինձ շատ ոգեւորեց: Մենք դրական ենք մտածում, հույս ունենք, որ մինչեւ Նոր տարի մեր նպատակին կհասնենք»:
Անժելա ՇԱՀՈՒՄՅԱՆ
