Երեւանի ոչ մի աղբավայրերում առայժմ աղբի տեսակավորում ու վերամշակում
չի արվում: Մինչդեռ աշխարհի մի շարք երկրներում վաղուց կենցաղային աղբից օգտահանված նյութերը վերամշակվում եւ կիրառվում են որպես երկրորդական արտադրանքի նյութ:
Այսօր Երեւանի քաղաքապետարանում տեղի ունեցած ասուլիսում Aravot.am-ը քաղաքապետարանի կոմունալ տնտեսության վարչության պետ Կառլեն Ղազարյանից հետաքրքրվեց, թե ե՞րբ կունենանք աղբի վերամշակման գործարան եւ թափոնները ոչ թե կայրվեն` վտանգավոր նյութերի արտանետումներով, այլ կօգտագործվեն տնտեսության մեջ: Պարոն Ղազարյանը վստահեցրեց, որ ճապոնական «Շիմիձու» ընկերությունն արդեն Նուբարաշենի աղբավայրում աղբը անվտանգ եղանակով այրում է, սակայն չի տեսակավորում ու վերամշակում. «Դրա համար մրցույթ է հայտարարված եւ մի քանի տեղական եւ արտերկրի ընկերություններ պետք է մասնակցեն եւ այդ գործն անեն»:
Պարոն Ղազարյանի խոսքերով, մայրաքաղաքային տնտեսություններն արդեն պատրաստ են ձմռանը, պահեստավորվել է 1680 տոննա աղ, ավազ, 300-400 մեքենա եւ այլ տեխնիկա կազմ ու պատրաստ սպասում են ձյանն ու մերկասառույցին:
Այս տարվա ընթացքում վերանորոգվել է բազմաբնակարան շենքերի 1380 վերելակ, 14 հազար գծամետր էլ` ջրամատակարարման նեքին ցանց: 111 կիլոմետր երկարությամբ փողոցների ու բակերի լուսավորություն է իրականացվել: Կառուցվել է վերգետնյա 7 անցում:
Կարդացեք նաև
Վարչության պետը դժգոհեց, որ շաբաթօրյակներին շատ բակերի բնակիչներ եւ համատիրություններ պասիվություն են դրսեւորում եւ զլանում են մասնակցել իրենց տարածքի մաքրման աշխատանքներին:
Հարցին, թե համատիրության ինստիտուտը մեր երկրում այդպես էլ չի կայանում եւ ի՞նչ է անհրաժեշտ դրա համար անել, պարոն Ղազարյանն ասաց, որ մի շարք համայնքներում ունեն օրինակելի համատիրություններ, բայց դեռեւս շատ անելիքներ կան համատիրությունների կայացման հարցում: Պատճառներից մեկը Կառլեն Ղազարյանի համոզմամբ, բնակիչների` սպասարկման վարձերի չվճարելն է, ինչի հետեւանքով շենքերի մուտքերի, վերելակների եւ այլ հարցեր չեն կարողանում լուծվել:
Գրաֆիկով որքան է սահմանված գիշերային լուսավորության ժամերը հարցին էլ՝ պարոն Ղազարյանն ասաց, որ ձմռանը ժամը 18-ից 24-ը, իսկ ամռանն այլ գրաֆիկով է լուսավորվում: Սակայն 105 կենտրոնական եւ որոշ երկրորդական փողոցներ մինչեւ լույս լուսավորված են լինում:
Լուսինե ԲՈՒԴԱՂՅԱՆ
