Հատված Կենտրոնական ընտրական հանձնաժողովի նախագահ Տիգրան Մուկուչյանի հարցազրույցից:
– Պարոն Մուկուչյան, Ավան թաղամասի ընտրությունների ժամանակ եւս բարձրաձայնվեց ցնդող թանաքի խնդիրը: Նախագահական ընտրություներին ընդառաջ կլուծվի՞ այդ խնդիրը, թե՞ էլի ականատես կլինենք նույն պատկերին:
– Հիմա նորից աշխատանքներ են տարվում: Նախ, այն նյութը, որն օգտագործվեց այս ընտրություններին, եթե համեմատենք նախորդի հետ, ապա որոշակի առումով փոփոխություն կար: Օրինակ, շատ-շատ տեղամասերում նյութը շատ նորմալ աշխատել է, եւ որեւէ խնդիր չի առաջացել: Բայց հիմա այդ խնդիրներով զբաղվող արտերկրյա կազմակերպության հետ նորից աշխատում ենք: Նրանք, ըստ էության, փորձում են կատարելագործել նյութը, որը լինի այնպիսի, որ ընդհանրապես խնդիրներ չառաջացնի: Ամեն դեպքում, երբ նյութը կորոշակիանա, այսինքն կպարզվի, թե ինչ նյութ է լինելու, մենք նյութի պրեզենտացիա կանենք, կհրավիրենք բոլոր ԶԼՄ-ներին, քաղաքացիական հասարակությանը: Բոլորը կգան-կտեսնեն, կհամոզվեն ինչի մասին է խոսքը եւ կհասկանան, որ որեւէ հետին միտք չկա այստեղ:
Կարդացեք նաև
– Բայց դա ի՞նչ նյութ է լինելու: Նյութ, որը որոշ ժամանակ հետո կցնդի՞, թե՞ չցնդող է լինելու:
– Նյութ, որը պետք է համապատասխանի ԸՕ-ի պահանջներին: Այսինքն՝ պետք է պահպանվի, պահպանման ժամկետի հետ կապված խնդիրներ չառաջանան, այսինքն՝ ավելի շուտ չանհետանա, իսկ հետագայում արդեն անհետանա:
– Հնարավո՞ր է պրեզենտացիայի ժամանակ նորմալ աշխատի թանաքը, իսկ հետո նորից խնդիրներ առաջանան, ինչպես եղավ խորհրդարանական ընտրությունների ժամանակ: Տեղամասերը բացվելուն պես պարզվեց, որ թանաքը նույն պահին ցնդում է, մինչդեռ հավաստիացնում էիք, որ ոչ մի խնդիր չի առաջանա:
– Մենք համենայնդեպս ենթադրում ենք, որ նյութի փորձարկումը լինելու է քվեարկությանը բավականին մոտ ժամանակահատվածում: Այսինքն՝ ոչ հիմա, որ նորից խնդիրներ առաջանան, այլ քվեարկության օրվանը բավական մոտ, որ մարդիկ համոզվեն, որ որեւէ խնդիր չկա, եւ շահարկումները, պայմանավորված այդ երեւույթով, կդադարեն:
Սոնա ՀԱՐՈՒԹՅՈՒՆՅԱՆ
«Հրապարակ»
