«Հուսալի պաշտպանություն» ՍՊ ընկերության տնօրեն Պետրոս Արզաքանցյանի դեմ քաղաքացիական հայց էր ներկայացրել իրավաբան Աննա Երիցյանը: Այս մասին մենք տեղեկացրել ենք Aravot.am-ում՝ լուսաբանելով Կենտրոն եւ Նորք-Մարաշ վարչական շրջանների ընդհանուր իրավասության դատարանում լսված հայցապահանջի մասին: Աննա Երիցյանը պահանջում էր 560.000 ՀՀ դրամի չափով արգելանք դնել ընկերությանը պատկանող գույքի վրա, բռնագանձել իր չվճարված աշխատավարձը եւ պարտավորեցնել, որպեսզի աշխատանքային պայմանագիր կնքվի իր հետ:
Նա նաեւ տեղեկացրել էր դատարանին, որ աշխատել է փաստաբանական գրասենյակում որպես գործավարուհի՝ փաստաբանի օգնական: Աշխատել է շաբաթը 6 օր: «Ծանրաբեռնված աշխատանքի պատճառով աշխատաժամանակի ընթացքում գրեթե ընդմիջում չեմ ունեցել»,- հայտնել էր Ա. Երիցյանը:
Այդ փաստաբանական գրասենյակը, ըստ հայցվորի, իր հետ աշխատանքային պայմանագիր կնքելու դիմումներին պատճառաբանել էր, թե հարկայինի հետ խնդիրներ ունի, հետագայում կձեւակերպի պայմանագիրը, սակայն աշխատավարձ կվճարի:
Դատարանը Երիցյանի հայցը բավարարել է մասնակիորեն, որոշելով «Հուսալի պաշտպանություն» ՍՊ ընկերությունից հօգուտ Ա. Երիցյանի բռնագանձել 65.000 դրամ՝ որպես չվճարված աշխատավարձի գումար: Դատարանը վերացրել է նաեւ մնացած 495.000 դրամի չափով դրված արգելանքը, որը կիրառվել էր այս տարվա սեպտեմբերի 26-ին՝ դատարանի որոշմամբ, որպես հայցի ապահովման միջոց:
Աննա Երիցյանը չի բացառում, որ կբողոքարկի վճիռը:
Ռուզան ՄԻՆԱՍՅԱՆ
