Սյունիքի մարզի զինվորական կոմիսարիատները 2012թ.-ի հունվարի 1-ից մինչեւ օրս պայմանագրային հիմունքներով ծառայության են ընդունել 392 զինապարտի: Այդ ուղղությամբ աշխատանքները դեռ շարունակվում են: Մարզի զինկոմիսարիատների կոմից կատարված այս եւ այլ աշխատանքների եւ առկա մի շարք խնդիրների մասին այսօր Սյունիքի մարզխորհրդի նիստի ժամանակ զեկուցեց Գորիսի զինվորական կոմիսար Մելիքսեթ Պողոսյանը: Անդրադառնալով ոլորտում առկա խնդիրներին` զինկոմը նշեց, որ որոշ դժվարություններ կան զինակոչիկներին տրվող ոչ բավարար ճանապարհածախսի, բուժհաստատություններում նրանց հետազոտման, հերթերի գոյացման եւ մի շարք այլ հարցերի հետ կապված: «Զինակոչիկներին տրվող ճանապարհածախսը չի համապատասխանում արդի պայմաններին:Եթե նախկինում զորակոչի ժամանակ զինակոչիկները փորձաքննվում էին թվով 36 քաղաքացիական բուժհաստատություններում, ապա այս զորակոչին` 12-ում, ինչը պատճառ է հանդիսացել հսկայական հերթերի կուտակմանը: Բուժհիմնարկներում իրականացվող Հոլթեր հետազոտությունը նույնպես ավելորդ բարդություն է առաջացնում զինակոչիկների մոտ: Այդ հետազոտությունն անցնելու համար զորակոչիկները հերթագրվում են, վերադառնում բնակության վայր եւ նշված օրը պարտավոր են նշված ժամին ներկայանալ բուժհիմնարկություն: Երկրորդ անգամ ներկայանալու համար ճանապարհածախս չի տրվում, ինչը դժգոհությունների առիթ է հանդիսանում զինակոչիկների եւ նրանց ծնողների շրջանում», – տեղեկացրեց նա:
Ըստ Մելիքսեթ Պողոսյանի, ի տարբերություն 2012թ.-ի գարնանային զորակոչի, երբ հնարավոր էր լինում որոշ հիվանդություններ հետազոտել Կապանի եւ Գորիսի բուժհիմնարկներում, այս զորակոչին տվյալ բազաները հանվել են: Մանկուց հաշմանդամ, վերջույթի բացակայությամբ կամ տեսողական խնդիրներով տառապող զինակոչիկն այսուհետ պետք է ուղեգրվի մայրաքաղաքում ստացիոնար բժշկական հետազոտում անցնելու համար: Զինվորական կոմիսարը մարզխորհրդի նիստի ժամանակ դիմեց Սյունիքի մարզպետին, որպեսզի նրա միջնորդությամբ առողջապահության նախարարությունից համապատասխան թույլտվություն ստանա, որ գոնե հաշմանդամ զորակոչիկները մարզի բուժհիմնարկներում հետազոտվելու հնարավորություն ունենան:
Մերի ՍՈՂՈՄՈՆՅԱՆ
