Տավուշի մարզի առաջին ատյանի դատարանում շարունակվում է ՀՀ փաստաբանների պալատի անդամ, նախկինում Իջեւանում հանրային պաշտպանի գրասենյակի փաստաբան Ռադիկ Պապյանի կնոջ` Իջեւանի զինկոմիսարիատի ֆինանսատնտեսական բաժանմունքի նախկին պետ Հրանուշ Ներկարարյանի դատավարությունը:
Գործով տուժողները 16 հոգի են, Ներկարարյանը խարդախությամբ յուրացրել է 10 միլիոն 732 հազար դրամ զինվորական թոշակներ: Բացի այդ, նա, 3-4 քաղաքացիների վստահությունը չարաշահելով, նրանցից գումարներ է վերցրել, մեկից` 80 հազար դրամ,մյուսից՝ 450 դոլար եւ այլն: Հ. Ներկարարյանը դատարանում իր մեղքն ընդունել է մասնակիորեն: Նա ընդունել է, որ յուրացրել է թոշակների գումարները, սակայն չի ընդունել, որ քաղաքացիների վստահությունը չարաշահելով` նրանցից գումարներ է վերցրել եւ չի վերադարձրել:
Գործով մեղադրողը պահանջել է Հ. Ներկարարյանին դատապարտել հինգուկես տարի ազատազրկման: Այս գործով դատական հաջորդ նիստը կկայանա դեկտեմբերի 14–ին:
Իսկ Տավուշի մարզի առաջին ատյանի դատարանում ավարտվել է Հ. Ներկարարյանի ամուսնու՝ փաստաբան Ռադիկ Պապյանի դատավարությունը: Համաձայն մեղադրական եզրակացության` Ռ. Պապյանը, հանդիսանալով ոստիկանության Տավուշի մարզի քննչական բաժնում քրեական գործով մեղադրյալ Էդվարդ Քոսակյանի շահերի պաշտպան, վերջինիս նախնական կալանքից ազատելու պատրվակով, Էդվարդ Քոսակյանի հորը` Սերժիկ Քոսակյանին համոզել, դրդել է առանձնապես խոշոր չափերով կաշառք տալ իր ծանոթ պաշտոնատար անձանց եւ խաբեությամբ նրանից հափշտակել է 3000 ԱՄՆ դոլլար:
Կարդացեք նաև
2012թ. սեպտեմբերի 14-ին Տավուշի մարզի առաջին ատյանի դատարանի դատավոր Ռաֆիկ Մելքոնյանը վճռել է ՀՀ քրեական օրենսգրքի 38-34-312 հոդվածի 3-րդ մասի 1-ին կետով Ռ. Պապյանին դատապարտել 3 տարի ժամկետով ազատազրկման եւ կիրառել ՀՀ Անկախության հռչակման 20-րդ տարեդարձի կապակցությամբ համաներում հայտարարելու մասին ՀՀ ԱԺ 2011թ. մայիսի 26-ի որոշման 8-րդ կետի 4-րդ ենթակետը և նշանակված ազատազրկման ձևով պատժի չկրած մասը կրճատել մեկ քառորդով` հաշվարկը թողնելով ՀՀ ԱՆ համապատասխան քրեակատարողական հիմնարկին: Դատարանը նրա նկատմամբ ընտրված խափանման միջոցը`ստորագրություն չհեռանալու մասին, թողել է անփոփոխ, մինչև դատավճռի օրինական ուժի մեջ մտնելը: Ռադիկ Պապյանը բողոքարկել է իր նկատմամբ կայացված դատավճիռը, վերաքննիչ բողոքի քննումն ընթացքի մեջ է:
Մինչ ընթանում է Ռ. Պապյանի եւ Հ. Ներկարարյանի դատավարությունը, Ռ. Պապյանն ամուսնալուծվել է Ներկարարյանից եւ ամուսնացել Դիլիջան քաղաքից մի աղջկա հետ:
Ոսկան ՍԱՐԳՍՅԱՆ
