Ներքին եւ արտաքին պարտքը աճել է: Այսօր Ֆինանսների նախարարությունում տեղի ունեցած ճեպազրույցում լրագրողներին հայտնեց նախարարության աշխատակազմի բյուջեների կատարման հաշվետվությունների եւ վերլուծության վարչության պետ Գայանե Զարգարյանը: Նա ներկայացրեց այս տարվա հունվար-հոկտեմբեր ամիսների բյուջեի կատարման ընթացքը: Տասը ամիսների ընթացքում պետբյուջեի եկամուտները կազմել են 752.6 միլիարդ դրամ, իսկ ծախսերը` շուրջ 751.1 միլիարդ դրամ, որոնք համապատասխանաբար` 80.9%-ով եւ 76.9 %-ով ապահովել են կառավարության տարեկան ծրագրի կատարումը: Արտաբյուջետային եկամուտները կազմել են 20.9 միլիարդ դրամ, իսկ ծախսերը` 16.4 միլիարդ: Առանց արտաբյուջետային միջոցների, պետբյուջեի եկամուտները կազմել են 731.7 միլիարդ դրամ: Նախորդ տարվա նույն ժամանակահատվածի համեմատ, պետբյուջեի եկամուտներն աճել են 9.1 %-ով կամ 63 միլիարդ դրամով: Գայանե Զարգարյանը վստահեցրեց, որ պետբյուջեի եկամուտների 94.2 %-ը ձեւավորվել են հարկային եկամուտների, պետական տուրքերի եւ պարտադիր սոցիալական ապահովության վճարները: Ֆիննախի մասնագետը վստահեցրեց, որ հարկային եկամուտների պլանը գերակատարվում է եւ մինչեւ տարեվերջ կհավաքագրվեն օրենքով նախատեսված հարկերի ծավալները:
Լուսինե ԲՈՒԴԱՂՅԱՆ
