«Ժառանգության» կուսակցության անդամ Անահիտ Բախշյանի գնահատմամբ, դեկտեմբերի 2-ին ԱԺ լրացուցիչ ընտրություններին թիվ 1 ընտրատարածքում օգտագործվել է վարչական ռեսուրսներն ու ընտրակաշառք: «Ստյոպա Սաֆարյանը համեմատ երեք անգամ պակաս ձայն է ստանում մյուս մրցակցից: Այդ թեկնածուին ոչ մեկ չի ճանաչում , միակ առավելությունը քաղաքապետի աներձագ լինելն էր»,- այսօր «Հայելի» ակումբում ասաց տիկին Բախշյանը: Հետո զարմացավ, թե ընտրողների մի զգալի մասն ինչու ընդհանրապես չմասնակցեց ընտրությանը.«Որովհետեւ հիասթափված են ու չեն հավատում փոփոխության»:
Աժ ՀՀԿ խմբակցության պատգամավոր Մարգարիտ Եսայանին էլ զարմացրել է ընդդիմության զարմանքը. «Ի վերջո այն համայնքում էին կատարվում ընտրությունները, որտեղ թաղապետ է աշխատել Տարոն Մարգարյանը, եւ չեմ կարծում, որ աներձագ լինելը մեղք է: Համոզված եմ ՝ այսպես խոսող ընդդիմության որեւէ քաղաքական ուժ լիներ իշխանություն՝ նույն կերպ էր վարվելու եւ պատգամավորի մանդատը ամեն կերպ վերցնելու էր հաստատ»: Մ Եսայանի խոսքերով, Ստյոպա Սաֆարյանի նման պրոֆեսիոնալների կարիք ԱԺ-ում կա, բայց.« Մյուս կողմից չեմ հասկանում՝ ինչու իշխանությունը պետք է ժեստ աներ եւ տեղը զիջեր: Տեղի են ունեցել նորմալ ընտրություններ եւ արդյունքում հաղթել է այն թեկնածուն, որն ավելի ուժեղ է եղել: Հանրապետական կառույցն այս ընտրատարածքում ուժեղ է: Ինչո՞ւ եք զարմացել, որ ընտրվել է ամենաուժեղ քաղաքական թիմի թեկնածուն»:
Տիկին Եսայանը չհամաձայնեց, որ ԱԺ լրացուցիչ ընտրություններում գաղափարական պայքար չի եղել. «Այդ պայքարի արդյունքում հաղթել է հանրապետականի գաղափարախոսությունը կրող թեկնածուն»:
Կարդացեք նաև
Տիկին Բախշյանը հակադարձեց. « Հաղթել է չխոսող մարդը»:
Մ. Եսայանն էլ հավելեց. «Երբեմն ավելի լավ է մարդը չխոսի, քան այսօր մեր որոշ քաղաքական գործիչներ խոսում են… ընդդիմությունը փոշիացրեց հասարակության ձայները, հիասթափեցրեց, տարավ կանգնեցրեց հրապարակում, հետո հրապարակից ուղարկեց տները, եւ եկան 7 հոգով տեղավորվեցին Ազգային ժողովում: Դուք այս ամեն ինչի մեջ միայն իշխանության մեղքն ե՞ք տեսնում: Ընդդիմությունը անմեղ հրեշտակի պես նստած է, իսկ հասարակությունը ինքն իրեն հիասթափվո՞ւմ է: Ընդդիմությունն այսօր ակտիվ չէ, ընդդիմության ներսում համերաշխություն չկա, ցանկացած օրինագծի քվեարկության ժամանակ, նույն ընդդիմությունը որ հայտարարում է, որ բանակցություններ են վարում, քննարկումներ են անցկացվում, ինչ-որ հարցերի շուրջ աշխարհաքաղաքական բաներ են պայմանավորվում, մեկ էլ շատ կարեւոր հարցի շուրջ պարզվում է, որ իրենք տարաձայնություններ ունեն: Դուք ուզում եք այս ընդդիմությանը հասարակությունը հավատա՞, ո՞նց հավատա»: Տիկին Բախշյանն էլ շարունակեց. «Շատ ճիշտ եք ասում, ընդդիմությունը ձեզ լավ թեմա է տվել, մեր աչքն եք մտցնում… այսօր իշխանությունն էլ մի բան չէ, ընդդիմությունն էլ »:
Արփինե ՍԻՄՈՆՅԱՆ
