Երկուշաբթի օրը Դուբայում բացվեց ՄԱԿ-ի ենթակայությամբ գործող Էլեկտրահաղորդակցության միջազգային միության հրավիրած գիտաժողովը, որ շարունակվելու է մինչեւ դեկտեմբերի 14-ը: Դրան մասնակցում են շուրջ 200 երկրների ներկայացուցիչներ, իսկ քննարկման թեման ինտերնետում կարգուկանոն հաստատելու հարցն է:
Ակնկալվում է, որ քննարկման առանցքում է լինելու ինտերնետի վերահսկողությունը ՄԱԿ-ի այդ կառույցին փոխանցելու հարցը։ Թեեւ կոնկրետ առաջարկներ դեռ չեն բարձրաձայնվել, սակայն մամուլում հայտնված որոշ փաստաթղթերի նախագծեր մեծացնում են ազատ ինտերնետի կողմնակիցների անհանգստությունը։
Եվրամիությունը, Միացյալ Նահանգները եւ խոշոր ինտերնետ ընկերությունները ինտերնետի վերահսկողության գաղափարին խիստ դեմ են արտահայտվում։ Գաղափարին կողմ են Ռուսաստանը, Չինաստանը, Տաջիկստանը, Նիգերիան, Սիրիան. այս պետությունները առաջարկում են, որ ինտերնետի իրենց հատվածի վերահսկողության իրավասություն տրվի իրենց:
Փոփոխություններին դեմ են ոլորտի խոշոր ներկայացուցիչները, օրինակ` Google կորպորացիան, որը այս քայլը համարում է համացանցի գրաքննություն եւ ստորագրահավաք է սկսել նախաձեռնության դեմ:
Կարդացեք նաև
Google-ի տվյալներով` գրաքննությունը ինտերնետում վերջին տարիներին արդեն իսկ ավելացել է: Աշխարհի 42 երկրներում ինտերնետում բովանդակության գրաքննություն կա, իսկ վերջին 2 տարիների ընթացում տարբեր երկրներ 19 նոր օրենքներ են ընդունել, որոնք սահմանափակում են ինտերնետում խոսքի ազատությունը:
Տաթեւիկ Լազարյան
«Ազատություն» ռադիոկայան
