«Ես չեմ կարծում, որ Հայ ազգային կոնգրեսը մեր ետեւում երբեւէ պայմանավորվածություն ձեռք բերի ՀՀԿ-ի հետ: ՀԱԿ-ը երբեւէ հանցավոր համաձայնության չի գա: Կարող է լինի համաձայնություն, բայց ներքին պայմանավորվածություններին չեմ հավատում»,- Aravot.am-ի հետ զրույցում ասաց Ալլա Հովհաննիսյանը՝ Մարտի 1-ի զոհերից Տիգրան Խաչատրյանի մայրը:
Հիշեցնենք, որ երեկ ՀՀ ԱԺ պետաիրավական հարցերի մշտական հանձնաժողովի նիստում իշխող մեծամասնության եւ Հայ ազգային կոնգրեսի միջեւ պայմանավորվածություն ձեռք բերվեց Մարտի 1-ին նոր խորհրդարանական հանձնաժողով ստեղծելու հարցը մինչեւ 1 տարով հետաձգելու մասին: Իշխող կուսակցության ներկայացուցիչները կարծում են, որ դա զերծ կպահի հարցը քաղաքականացնելուց: Իսկ ՀԱԿ-ում հավատում են Հանրապետականի եւ ՕԵԿ-ի այն խոստմանը, որ հարցի հետաձգման պարագայում մեծամասնությունը կողմ է քվեարկելու նոր հանձնաժողովի ստեղծմանը: Երեկ հանձնաժողովի նիստից հետո ԲՀԿ-ական գործիչները կասկածներ արտահայտեցին ՀԱԿ-ի լավատեսության վերաբերյալ:
ՀԱԿ-ի լավատեսությանն ուղղված որոշակի կասկածներ ունի նաեւ Ալլա Հովհաննիսյանը. «Ուղղակի եթե ես լինեի, ես չէի համաձայնվի, կասեի թող հիմա լինի քվեարկությունը, անգամ եթե Հանրապետականն ու ՕԵԿ-ը դեմ քվեարկեին, որովհետեւ ես համոզված եմ, որ մեկ տարի հետո էլ իրենք մեկ է, դեմ են քվեարկելու»:
Կարդացեք նաև
Տիկին Հովհաննիսյանը մտածում է, որ հարցի հեղինակ Գագիկ Ջհանգիրյանը միգուցե մտածեց, որ ավելի լավ է այս պահին ինչ-որ հույս ունենալ, քան ոչ մի բան: Բայց ինքը այդպես չի գտնում. «Կարծում եմ, որ իրենք պետք է ստիպեին, որ քվեարկությունը տեղի ունենար, որովհետեւ իշխանության վրա որեւէ հարցում հույս դնելուն ես դեմ եմ, մանավանդ որ, Հովհաննես Սահակյանը «Ազատություն» ռադիոկայանին ասել էր՝ հինգ տարի է անցել, ի՞նչ բացահայտում: Հիմա էլ մի տարի էլ շատ են տալիս, որ ասի վե՞ց տարի է անցել: Ես գտնում եմ, որ չպետք է համաձայնեին»:
Նելլի ԳՐԻԳՈՐՅԱՆ
