Կառավարությունը Համաշխարհային բանից 12 մլն դոլարի նոր վարկ է վերցնելու՝ հարկային վարչարարության բարելավման նպատակով: Այսօր ԱԺ նիստում Պետեկամուտների կոմիտեի նախագահի տեղակալ Արմեն Ալավերդյանը ներկայացրեց, թե մասնավորապես ինչ են անելու այդ վարկով, ինչպես են վերազինելու իրենց տեխնիկան եւ այլն:
ՀԱԿ պատգամավոր Նիկոլ Փաշինյանը դժգոհեց՝ ասելով, որ կառավարությունը պարբերաբար տարբեր վարկային ծրագրեր է բերում, տարբեր տոկոսադրույքներով. «Մեր պատմության մեջ առաջին անգամ պետական բյուջեով արտաքին պարտքի սպասարկման գումարը 400 մլն դոլարի է մոտենում: Ինչո՞ւ կառավարությունը ներքին ռեսուրսների վրա չի հենվում: 12 մլն դոլար վարկը ի՞նչ է նշանակում, այն նորից փակելու է ՀՀ ժողովուրդը, ուստի էլի ժողովրդից է վերցվում, չէ՞: Շատ ոլորտներում կոռուպցիոն ռիսկն այնքան մեծ է, որ այդ առումով այդ 12 մլն-ը փոքր թիվ է: Մենք ամեն քառօրյային մեծացնում ենք ՀՀ պարտքի բեռը՝ ի հեճուկս կառավարության ստանձնած պարտավորության»:
Արմեն Ալավերդյանն էլ պատասխանեց. «Էլեկտրոնային հաշվետվությունների համար է դա պետք, ամառվա ընթացքում համակարգիչները կախվում են, գործը կանգնում է, այսօրվա մեր ունեցած տեխնիկական սարքերով հնարավոր չէ առաջ գնալ ու ապահովել էլեկտրոնային հաշվետվությունների համակարգը: Մեզ անհրաժեշտ է ունենալ այդ ժամանակակից տեխնոլոգիաները»:
Կարդացեք նաև
Նիկոլ Փաշինյանը ավելի հստակեցրեց իր հարցը. «Ես ասում եմ՝ գումա՞ր է պետք՝ այդ գումարը ներքին ռեսուրսներից վերցրեք: Օրինակ, Հարկային պետական տեսչության պետի ծաղկաձորյան առանձնատունը վաճառքի հանեք՝ 4 հատ այդպիսի ծրագիր կանեք: Մետրոյի հետ կապված, ամեն ինչի հետ կապված կառավարությունն ասում է ներքին ռեսուրսների վրա ենք հիմնվում, բայց անընդհատ վարկեր եք վերցնում»:
Արմեն Ալավերդյանը հիշեցրեց 90-ականների վարկերը՝ ասելով, որ մինչեւ հիմա դրանց տոկոսներն են փակում:
Հռիփսիմե ՋԵԲԵՋՅԱՆ
