Ավան եւ Նոր Նորք վարչական շրջանների ընդհանուր իրավասության դատարանում Դավիթ Հարությունյանի նախագահությամբ այսօր պետք է շարունակվեր «Հարսնաքար» ռեստորանային համալիրում այս տարվա հունիսի 17-ին բռնարարքի ենթարկված ռազմական բժիշկների եւ Վահե Ավետյանի մահվան գործով հարուցված քրեական գործի դատաքննությունը: Այս անգամ էլ պաշտպանական կողմից ամբաստանյալների պաշտպաններից երկուսն էին բացակայում՝ Արմեն Խաչատրյանն ու Երեմ Սարգսյանը:
Ա. Խաչատրյանից դատարանը նոյեմբերի 30-ին ստացել էր դիմում այն մասին, որ այսօր ժամը 13.30-ին Կենտրոն եւ Նորք-Մարաշ դատարանում նախապես՝ նոյեմբերի 21-ի դատական նիստում որոշվել էր այսօրվա նիստի մասին: Խաչատրյանը խնդրել էր իր բացակայությունը համարել հարգելի եւ դատական նիստը նշանակել մեկ այլ հերթի:
Ի տարբերություն նրա, Երեմ Սարգսյանը ոչ միայն հղում էր արել այսօր նշանակված մեկ այլ քրգործով վերաքննիչ դատարանի նիստի մասին, այլ հղում էր արել անգամ Դատալեքս տեղեկատվական համակարգին՝ իր մասնակցելիք նիստի մասին:
Կարդացեք նաև
Դատավոր Դ. Հարությունյանն ասաց, որ Դատալեքսով իսկապես նշանակված է եղել Ե. Սարգսյանի կողմից նշված նիստը, ուստի նրա բացակայությունը համարվեց հարգելի, իսկ Ա. Խաչատրյանինը՝ անհարգելի:
Դատական նիստը նշանակվեց դեկտեմբերի 5-ին, քանի որ առանց պաշտպանների մասնակցության անհնար էր այն շարունակել:
Ռուզան ՄԻՆԱՍՅԱՆ
