Տավուշի մարզի Իջեւան քաղաքի 54-ամյա բնակիչներ Սարգյուլ Սիրեկանյանը եւ Կարինե Օթարյանը մեղադրվում են ՀՀ քրեական օրենսգրքի 262-րդ հոդվածի 2-րդ մասի 5-րդ կետով («Պոռնկությամբ զբաղվելուն նպաստելը»): Այն պատժվում է ազատազրկմամբ՝ երեքից վեց տարի ժամկետով:
Ամբաստանյալ Սարգյուլ Սիրեկանյանին մեղադրանք է առաջադրվել, որ նա 2011 թվականից մինչեւ 2012 թվականի հունիս ամիսը Իջեւան քաղաքի Չըռչռ կոչվող տարածքում իր կողմից օգտագործվող ճաշարանի հաճախորդ տղամարդկանց համար հրավիրել է մարմնավաճառների:
Կարինե Օթարյանին մեղադրանք է առաջադրված, որ նա որպես ադմինիստրատոր աշխատելով Իջեւան քաղաքի սննդի եւ հանգստի կազմակերպման համալիրներից մեկում՝ հյուրանոցի սենյակները հաճախորդ տղամարդկանց հետ հանդիպելու, պոռնկությամբ զբաղվելու համար տրամադրել է մարմնավաճառներ Ա. Գրիգորյանին, Ա. Ղազարյանին, Ա. Խաչինյանին, Զ. Փարսադանյանին եւ Ա. Մկրտումյանին:
Կարդացեք նաև
Ամբաստանյալ Սարգյուլ Սիրեկանյանը դատարանում պաշտպան չունի, Կարինե Օթարյանն օգտվում էր պաշտպանի ծառայություններից:
Նոյեմբերի 30-ին Սարգյուլ Սիրեկանյանի դատավարությունը հետաձգվել է, հաջորդ նիստը կկայանա դեկտեմբերի 10-ին: Նույն օրը կայացած նիստում դատախազ Վրեժ Առաքելյանը պահանջել է Կարինե Օթարյանին դատապարտել 3 տարվա ազատազրկման: Տավուշի մարզի առաջին ատյանի դատարանի դատավոր Ռաֆիկ Մելքոնյանը կիրառել է ՀՀ քրեական օրենսգրքի 70-րդ հոդվածը եւ Կարինե Օթարյանին դատապարտել 4 տարվա պայմանական ազատազրկման:
Ոսկան ՍԱՐԳՍՅԱՆ
