Կոտայքի մարզի դատախազության նախկին ավագ դատախազ Մեսրոպ Մանրիկյանի որդու՝ Ալբերտ Մանրիկյանի և լրագրող Ռուբեն Գրդզելյանի դեմ գործով վերաքննիչ բողոքի քննությունն այսօր Վերաքննիչ քրեական դատարանում հետաձգվեց: Լրագրող Ռուբեն Գրդզելյանն իր պաշտպանի հետ դատարան չէր ներկայացել: Հաջորդ նիստը նշանակվեց դեկտեմբերի 12-ին:
Նախկին դատախազ Մեսրոպ Մանրիկյանը այս գործով Կենտրոն և Նորք Մարաշ վարչական շրջանների ընդհանուր իրավասության դատարանի որոշումը մեզ հետ զրույցում համարեց պատվիրված ու վստահեցրեց, որ Վերաքննիչ դատարանում էլ են վերեւից դատավորին ասելու`ինչ վճռի. «Դատարանը տարավ անհրաժեշտ պաշտպանություն հասկացողության, սահմանազանցում: Իբրեւ թե Գրդզելյանը պաշտպանվել է իմ հարվածներից, երբ քրեական նախաքննության ընթացքում նա ոչ մի անգամ չի ասել, որ իր գործողությունները կապված են պաշտպանության հետ: Գիտեմ դատարանի վրա ազդեցությունը, չգիտեք` ով է պատվիրատուն, ով է նրա բարեկամը: Այս դատարանը նույնն է անելու: Պատվիրված դատավարութուն է: Գիտեմ ` ինչ է լինելու, միայն, թե արագ լինի, որ հասցնեմ դիմել Վճռաբեկ եւ եվրոդատարան»:
Հիշեցնենք, որ Կենտրոն և Նորք Մարաշ վարչական շրջանների ընդհանուր իրավասության դատարանի որոշմամբ, Ռ. Գրդզելյանն անմեղ էր ճանաչվել, իսկ Ա. Մանրիկյանը տուգանվել էր 50.000 դրամով:
Նաեւ հիշեցնենք, որ Մեսրոպ Մանրիկյանի որդին` Ա. Մանրիկյանին մեղադրանք է առաջադրվել այն բանի համար, որ նա 12.05.2012թ. Երևանի Տ. Մեծի փողոց 36-րդ շենքի բակում դիտավորությամբ ձեռքով հարվածել է հոր` Մեսրոպ Մանրիկյանի հետ վիճաբանության մեջ մտած Ռուբեն Գրդզելյանի դեմքին, որի հետևանքով վերջինս ստացել է առողջությունը կարճատև քայքայող մարմնական վնասվածք:
Կարդացեք նաև
Արփինե ՍԻՄՈՆՅԱՆ
