ՀԱԿ խմբակցության պատգամավոր Գագիկ Ջհանգիրյանը լրագրողների հետ ճեպազրույցում բացատրեց, թե ինչու ինքը համաձայնեց, որ Մարտի 1-ի նոր ժամանակավոր հանձնաժողով ստեղծելու հարցի քվեարկությունը հետաձգեն մինչեւ 1 տարի ժամկետով. «Քանի որ իշխող կոալիցիան մեծամասնություն ունի բոլոր հանձնաժողովներում, ուզենք թե չուզենք, մենք հաշվի պետք է նստենք այդ հանգամանքի հետ: Ես նորմալ վերաբերվեցի այդ առաջարկությանը, հակառակ դեպքում հանձնաժողովը բացասական եզրակացություն էր տալու: Բնական է, նաեւ ԱԺ-ն չէր քվեարկելու հօգուտ այդ հարցի, եւ մենք ունենալու էինք տապալված նախաձեռնություն: Դա կանխատեսելի սցենար էր: Ուզում եմ վստահ լինել, որ իրենք իրենց խոսքի տերն են, եւ այդ հանձաժողովը կստեղծվի իմ նախաձեռնությամբ՝ նախագահական ընտրություններից անմիջապես հետո: Ես այդ հարցը կրկին կբարձրացնեմ, բոլոր ուժերը միակարծիք կլինեն»:
Aravot.am-ի հարցին՝ դա «փափուկ բարձ» չէ՞՝ Գագիկ Ջհանգիրյանը պատասխանեց. «Ես այդպիսի որակումներ չեմ ուզում տալ: Ես ուզում եմ հավատալ, որովհետեւ ՀՀԿ-ն հրապարակավ հայտարարեց իր այդ դիրքորոշման մասին, որ պատրաստ են նախագահական ընտրություններից հետո քվեարկել այդ հանձնաժողովի ստեղծման օգտին: Քանի որ սա միայն իմ հարցը չէ, նախեւառաջ 10 սպանվածներ մենք ունենք, բազմաթիվ վիրավորվածներ ունենք, հազարավոր հալածյալներ ունենք, եւ խնդրի կարեւորությունից ելնելով, այո, եթե կուզեք, ես ինչ-որ չափով հաղթահարեցի նաեւ իմ անձնական տեսակետը եւ համաձայնեցի այդ որոշման հետ»:
ՀԱԿ պատգամավորը նաեւ ասաց, որ իրենք մասնագիտական գնահատականներ պետք է տան հանձնաժողովում եւ փորձեն զերծ մնալ քաղաքական գնահատականներից: Նրա խոսքերով՝ «Հանձնաժողովի խնդիրն այնքան կարեւոր է, որ այսպիսի լուրջ զիջումների ես գնացել եմ նաեւ գիտակցաբար: Ես իմ գիտակցական կյանքում շատ բան եմ տեսել, եւ պատրաստ եմ էլի դժվարությունների հանդիպել»:
Կարդացեք նաև
Հռիփսիմե ՋԵԲԵՋՅԱՆ
