«Օսկար» մրցանակաբաշխությանը ներկայացված հայկական ֆիլմը ցույց է տալիս, թե ինչպես է մարդկությունը հաղթում նախապաշարմունքներին: Բայց քանի որ ֆիլմում շոշափվում է նաև Ադրբեջանը, այն երկու ժողովուրդների համար ևս մեկ թունավոր վեճի թեմա է դարձել: Գրում է Պատերազմի և խաղաղության լուսաբանման ինստիտուտը` նկատի ունենալով «Եթե բոլորը» ֆիմը: Ֆիլմում մի տղամարդ օգնում է ռուսահայ աղջկա, որ գնա իր հոր գերեզմանի մոտ ու ծառ տնկի այնտեղ: Հայրը մահացել է Ղարաբաղյան պատերազմում:
Ադրբեջանցի գրող Էլչին Հուսեյնաբայլին պնդում է, որ ֆիլմի սցենարը գողացել են իր 2010թ. գրված «Արևից կուրացած» պատմվածքից:
«Պատմությունը, որը ես եմ գրել այսպիսին է. հիվանդ ադրբեջանցի բժիշկը մտնում է Ղարաբաղի տարածք, որպեսզի կատարի իր պապի ցանկությունը` ծառ տնկի նրա տան բակում: Հերոսն ուզում է տեսնել իր հոր գերեզմանը, բայց տարածքը հայերի հսկողության տակ է գտնվում ու նրան ձերբակալում են: Սակայն երկար բանակցություններից հետո նրան թույլ են տալիս կատարել իր ցանկություն», – ասել է ազերի գրողը ադրբեջանական կայքերից մեկին տված հարցազրույցում և եզրափակել, – «Նրանք օգտագործել են իմ պատմությունը, սակայն փոփոխել են իրենց ուզածի պես»:
Կարդացեք նաև
ՊԽԼԻ-ն զրուցել է «Եթե բոլորը» ֆիլմի սցենարի հեղինակ Միքայել Պողոսյանի հետ, որն ասել է, որ ֆիլմի վրա երկար են աշխատել և ֆիլմի մտահղացումն ավելի շուտ է առաջացել, քան Հուսեյնբայլին տպագրել է իր գործը:
«Ֆիլմի սցենարը գրվել 2010թ. սկզբներին, իսկ նկարահանումները սկսվել են 2010թ. գարնանը: Մինչ պատմությունը գրելը մենք հանդիպել ենք մարդկանց, որոնք վերապրել են պատերազմը: Այդ մարդկանց հետ ծանոթանալուց ու խոսելուց հետո էր, որ ստեղծվեց ֆիլմի գաղափարը», – ասել է Պողոսյանը, – «Մենք նույն կերպ կարող ենք մեղադրել Ադրբեջանին մեր «Կարոտ» ֆիլմի պատմությունը գողանալու համար, որտեղ գլխավոր հերոսն անցնում է սահմանը, որ իր հայրենիքում մահանա»:
Պատրաստեց Հովհաննես ԻՇԽԱՆՅԱՆԸ
