«1988 թ.-ին իմ ընկերներին ասացի, որ դառնալու եմ ՀՀ 4-րդ պրիզիդենտը: Իմ ամբողջ գիտակցական կյանքը անցել է այդ շեշտադրումով»,-այսօր լրագրողների հետ հանդիպման ժամանակ նշեց ՀՀ նախագահի թեկնածու առաջադրվել պատրաստվող էպոսագետ Վարդան Սեդրակյանը:
Նրա պնդմամբ՝ ինքը կուսակցական ոչ մի խմբի անդամ չէ եւ պետական պաշտոն նույնպես չի զբաղեցնում.
«24 տարի մտածել ու շարժվել եմ այս ուղղությամբ: Կառավարման պետական համակարգում կա մի շատ կարեւոր էլեմենտ, որը Հայաստանում գոյություն չունի: Հնում պետության ղեկավարը նաեւ գերագույն քրմապետ էր, մեր պետության մեջ պակասում է այդ էլեմենտը»:
Էպոսագետը կարծում է, որ ազգային մտածողության հիմքն է պակասում մեր պետության մեջ` ժամանակն է, որ պետության հիմքում դնենք կրոնական ազգային մտածողությունը, որը վեր է ցանկացած քաղաքական մտածողությունից.
Կարդացեք նաև
«Եթե կա մի բան, որ պետք է արվի, ուրեմն պետք է անես: Մարդ, երբ կոնկրետ նպատակ ու անելիք ունի, պետք է դնի իր թեկնածությունը: Միգուցե չկարողանամ հաղթել, բայց համոզված եմ, որ սա լինելու է իմ եւ ՀՀ երեք նախկին նախագահների հաղթանակը»:
Բանախոսը չի էլ պատրաստվում քաղաքական գործիչ դառնալ, Աստված նրան ազատել է այդ ծանր բեռից.
«Գալիս եմ արդարություն հաստատելու համար, իմ շուրջը պետք է համախմբվեն 3 նախկին նախագահները, մենք պարտավոր ենք երկիրը հանել այս վիճակից: Չեմ եկել որեւէ մեկի հետ մրցակցելու ու ինձ որեւէ մեկը չի հովանավորում»:
Վարդան Սեդրակյանը չի գալիս որեւէ մեկին ոչնչացնելու կամ կործանելու համար, քաղաքականության մեջ էլ էկզոտիկայի պակաս չի նկատում.
«Բարգավաճ Հայաստան կուսակցությունը ստեղծվել է, որպես Հանրապետական կուսակցության դուստր ձեռնարկություն: Կան հարյուրավոր թեկնածուներ, սակայն ես առաջին օրվանից էլ ասել եմ, որ 3 մարդ է պատասխանատու»:
Անժելա ՇԱՀՈՒՄՅԱՆ
