«Յուրաքանչյուր պետության համար կրթության բնագավառը հանդիսանում է պետության զարգացման գործում ռազմավարական նշանակություն եւ կարեւորություն ունեցող ոլորտ, ուստի հաճախ պետության զարգացման հեռանկարները հասկանալու համար ուսումնասիրվում է տվյալ երկրի կրթական համակարգի ռազմավարությունը»,-այսօր «Գիտելիքահեն տնտեսությունը եւ բարձրագույն կրթության բարեփոխումները» խորագրով քննարկման ժամանակ նշեց քաղաքագետ-փորձագետ Արեւիկ Անափիոսյանը:
Նրա պնդմամբ բարձրագույն կրթությունը պետք է կարողանա վերափոխել եւ զարգացնել ուսանողի իմացական ընկալումը: Դրա արդյունավետ մեթոդներից մեկը ինքնուրույն, քննադատական մտածողության զարգացումն է:
ԵՊՀ սոցիոլագիայի ֆակուլտետի դասախոս Աննա Փոխսրարյանը հետազոտել է կրթության` աշխատաշուկայի հետ ինտեգրացման պրոցեսը: Ըստ հետազոտությունների այդ երկուսի կապին խանգարող էական գործընթացներից մեկը մասնագետի վերաբերյալ բուհի եւ աշխատանքային շուկայի պահանջների ու ընկալումների տարբերությունն է. «Գործատուին հետաքրքրում է գործնական հմտությունը, իսկ կրթությունը շեշտը դնում է հիմնարար գիտելիքների վրա: Աշխատանքով ապահովված լինելու համար հարցվածներից 54.7 %-ը հույսը դնում է ծանոթությունների ու կապերի վրա, իսկ 33.7 %-ը անձնական նախաձեռնության եւ գործատու կազմակերպությունների»:
Հետազոտողները ներկայացրեցին բարձրագույն կրթության համակարգի վերակառուցման գործընթացը եւ Հայաստանում գիտելիքահեն տնտեսության դրսեւորման մարտահրավերները՝ առաջարկություններ ներկայացնելով քաղաքականությունների վերաբերյալ՝ հիմնվելով իրենց հետազոտությունների արդյունքների վրա:
Անժելա ՇԱՀՈՒՄՅԱՆ
