«Մենք արդեն պայմանավորվում ենք երկրորդ փուլի մասին»,- այսօր մամուլի ասուլիսում պատասխանելով լրագրողների՝ ներքաղաքական իրավիճակին եւ քաղաքական կոնսուլտացիաներին վերաբերող հարցերին, ասաց ՀԱԿ համակարգող Լեւոն Զուրաբյանը՝ խոստանալով պայմանավորվածության առկայության դեպքում իրազեկել լրագրողներին:
Հարցին՝ ի՞նչ է նշանակում «երկրորդ փուլ», խոսքը նախագահի թեկնածուի հարցի քննարկման մասի՞ն է, Զուրաբյանն ասաց. «Կարծես, ենթատեքստից կարելի է հասկանալ, որ խոսքը արդեն դրա մասին է, որ ավելի կոնկրետ խոսենք նաեւ անձնական թեկնածուների հարցերի շուրջ: Մենք, իհարկե, ունենք թեկնածու, որին համարում ենք ամենահզորը, ամենահամախմբողը: Դուք շատ լավ գիտեք այդ թեկնածուի անունը, բայց մենք դեռ գտնվում ենք բանակցությունների փուլում եւ այս ժամանակաշրջանում ավելորդ ենք համարում դրա մասին խոսել: Մեր թեկնածուն իր որոշումը դեռ չի ընդունել, ինքն իր որոշման մասին կհայտնի: Մի քիչ էլ համբերեք»:
Նելլի ԳՐԻԳՈՐՅԱՆ
