Այսօր «Մհեր Մկրտչյան» արտիստական թատրոնում դերասաններ Վարդան Պետրոսյանն ու Կարինե Ջանջուղազյանը բեմադրեցին հատվածներ` ցմահ բանտարկյալ Մհեր Ենոքյանի բանտային օրագրից:
Դերասանները ներկայացրեցին օրագրի այն հատվածները, որոնցում Մհեր Ենոքյանը պատմում է բանտային կյանքի, իր ապրումների եւ փախուստի մասին:
Ցմահ դատապարտյալների հարցերով զբաղվող հասարակական կազմակերպության ներկայացուցիչ Զարուհի Մուրադյանը հայտնեց, որ ժամեր առաջ Մհեր Ենոքյանն ընդունվել է Սլավոնական համալսարան. «Հանձնաժողովի անդամները դուրս են եկել բանտից եւ ասել, որ ապշած են Մհերի ցուցաբերած բարձր առաջադիմությամբ»: Մուրադյանը հավելեց, որ 16 տարի առաջ այս օրը Մհեր Ենոքյանին դատապարտել են մահվան:
Կարդացեք նաև
Լրագրողների հետ զրույցում Վարդան Պետրոսյանը նշեց, որ ներկայացումով հանրության ուշադրությունը բեւեռում են լուրջ խնդրի վրա. «Ինչպես հայտնի է, Մհեր Ենոքյանն իրեն մեղավոր չի ճանաչում եւ խնդրում է վերանայել իր գործը: Համակարգի աշխատողները տեսնում են առկա թերությունները, եւ, միգուցե, որոշ ցմահ դատապարտյալների գործեր հետագայում վերանայվեն»:
Մհեր Ենոքյանի մայրը` Օհանյան Վարդուհին, չցանկացավ անդրադառնալ իր հարազատների եւ տղայի անցած 17 տարվա քարքարոտ, ուրախ եւ տխուր ճանապարհին. «Պարզապես ինձ համար հուզիչ է այն հանգամանքը, որ երկար տարիների վայրիվերումներից հետո վերջապես արթնացավ մեր հասարակությունը, հատկապես` մտավորականները»:
Լուիզա ՍՈՒՔԻԱՍՅԱՆ
