«Թռչկան» քաղաքացիական նախաձեռնության իրավաբան Մերի Խաչատրյանի համոզմամբ, բնապահպանության նախարարն է «Նոնո» մականունով Գաբրիել Պողոսյանին հորդորել հրաժարվել «Խոսրովի անտառ» պետական արգելոցի տնօրենի պաշտոնից:
«Նոնոյի պահվածքից չնկատեցի, որ պատրաստ է հրաժարվել այդ յուղոտ պաշտոնից, եթե այդ գիտելիքներով, այդ մակարդակով եկել էր, մասնակցել: Ու այն, որ այդքան հանկարծակի ասաց՝ հրաժարվում եմ, երեւաց, որ նախարարն այս մի քանի օրը նրա վրա աշխատել է, համոզել՝ եղբայր, ավելի լավ է քո նախաձեռնությամբ դիմում ներկայացնես, հեռանաս, որ մրցույթը չեղյալ համարելու հիմք ունենամ: Հակառակ դեպքում նախարարը իրեն կհակասեր: Ինքը, որ այդպես կիսատ- պռատ փաստաթղթերն ընդունել էր, մրցույթին էլ հայտարարել էր, որ Պողոսյանը 85 միավոր է հավաքել, ու հետո հենց չեղյալ համարել մրցույթը: Հետեւաբար նախարարն իր կաշին փրկելու համար ընտրեց ամենահեշտ ճանապարհը»,- Aravot.am-ին ասաց Մ. Խաչատրյանը:
Նա նաեւ հավելեց, որ նոր մրցույթում իրենց թեկնածուները եւս մասնակցելու են ու եթե հարկ լինի, այդ թեկնածուներին ներկայացնելու համար նախքան մրցույթը հանրային քննարկում կկազմակերպեն. «Սա փոքրիկ հաջողություն էր, որ կարողացանք տապալել այդ մրցույթը: Մեր պահանջը չեղյալ համարելն էր»:
Հիշեցնենք, որ քաղաքացիական նախաձեռնությունը օրեր առաջ հանդես էր եկել մրցույթը չեղյալ հայտարարելու պահանջով:
Կարդացեք նաև
Արփինե ՍԻՄՈՆՅԱՆ
